Тываның Баштыңы В.Ховалыгның Россияның Транспорт яамызынга киирген дилээм ёзугаар Росавтодорнуң ажылчын бөлүү Тываның автооруктарының үрелиишкининге хамаарыштыр хыналда ажылын чорудуп эгелей берген.
Үрелиишкинниң хемчээлин тодарадыр, улаштыр септелге ажылын чорудар, үрелген кезектерни катап тургузары-биле эки хынамчалыг анализти кылыры негеттинип турар. Хемнерниң хенертен улгатканы-биле көвүрүглер, кежиглер үрелген таварылгалар бүрүткеттинген. Ооң-биле чергелештир тус черниң комиссиялары ооң мурнунда үерге таварышкан өрегелерниң санын тодарадыр ажылдарны чорудуп турар.
Орук чериниң болгаш оперативтиг албаннарның каттышкан хемчеглериниң ачызында, кежиглерни септеп турар. Ындыг-даа болза, ам-даа чамдык черлерже, Бай-Тайга кожууннуң Кызыл-Даг биле Кара-Хөл сумуларынче Сүт-Хөлче чедип турары дег, улуг машиналар долганып, оюп чедип турар.
Сүт-Хөл, Барыын-Хемчик, Бай-Тайга кожууннарда тус черниң деңнелинде онза байдал чуруму уламчылап турар. Үерниң чедирген салдарын шынарлыг чайладыр, деткимчелерни көргүзер, хамык күштерни хаара тудары-биле онза байдалдың чурумун регионалдыг деңнелче киирерин шиитпирледивис. Тараазын оскунган Агро-үлетпүр комплекизиниң коллегаларынга дузалажыры-биле онза кичээнгейни салып турар бис.
Арга-арыгның өрт байдалдары ам-даа хыналдада турар. Диңмирээшкин-кызаңнаашкын дүжүп, чамдык чедери берге черлерге өрт үнүп болур айыыл тургустунуп турар. Ол талазы-биле тускай мергежилдиглер белен байдалда ажылдап турарлар.