Тываның сайыттар кабинеди регионнуң ветеринария албанының кииргени хоойлу төлевилелин сайгарып көрген. «Тыва Республиканың девискээринде ээзи чок дириг амытаннарны тударының дугайында» республика хоойлузунче эдилгелерни киирген. Кол өскертилге – кудумчуда ээзи чок ыттарны, кулаанда демдектиг-даа болза, шуптузун тударын көрген.
Бо тускай хемчег дээрзин төлевилелдиң тургузукчулары демдеглээн. Кызылдың төвүнге калчаа аарыг ыттарны илереткен соонда, ол хемчег республиканың найысылалында чарлаан карантин үезинде ажылдаарын төлевилелде айыткан. Дом быта районунда ийи аарыг ытты тып, туткан. База бир ытты «Херел» спорт залының чоогундан туткан. Үш ыттан алган биоматериалдарда айыылдыг халдавыр барын лабораторлуг шинчилел тодараткан. Аарыг ыттарны узуткаан.
«Калчаа аарыы – өлүмге чедирер айыылдыг вирус. Оон эмнээр арга амдыызында чок. Халдавырдан камгаланыр хемчеглерни алыры чугула. Ынчангаш ындыг тускай хемчегни саналдап тур бис» — деп, Тыва Республиканың ветеринария албанының удуртукчузунуң албан-хүлээлгезин күүседип турар Алексей Ооржак чугаалаан.
Ол ышкаш азырал амытаннар ээлери ыт-кужунче онза кичээнгейни салыры чугула деп немээн. Бажыңче аарыгны киирбес дизе, ыттарын хостуг салбас, багга баглаар. Аарыг ыттың чараазын чылгаптарга-ла, вирусту халдадып ап болур деп, специалистер тайылбырлаан. Аарыг ыттың кудумчуда төктүп каан чараазы безин, халдавырның мага-ботче киреринге чедирип болур.
«Азырал амытан аарыг черлик ыттың чараазын анаа чыттапкаш, калчаа аарыындан аарый бээр ийикпе, азы ону бажыңче азы аал-коданче эккеп болур» — деп, Алексей Ооржак тайылбырлаан.
Республиканың Чазаа тайылбырларны киирип, хоойлу төлевилелин бадылаан. Тываның Дээди Хуралынга ону сайгарып, бадылаар кылдыр чоруткан.
Бистиң корр.
“Шын” №92 2024 чылдың ноябрь 30