Тускай херекселдерни салыр

Бо одалга сезонунда Тывада угарлыг газтан хораннангаш, амы-тынындан чарлып турар болуушкуннар көвүдээн. Тыва Республиканың күш-ажыл болгаш социал политика сайыды Эдуард Сандан чурттакчы чонну өрт айыылын болгаш угарлыг газтан хораннаныр чорукту баш удур тургуспазы-биле, печкалар болгаш хоолайларын үе-шаанда септеп-селип, аштап-арыглап, харыысалгалыг болурунче кыйгырган.

“Хүндүлүг чаңгыс чер чурттугларывыс, силер бүгүнү боттарыңарның бажың-балгадыңарны, ажы-төлүңерниң болгаш боттарыңарның чуртталгаңарны, кадыкшылыңарны камнап, бажыңнарыңарда одалга системаларынга чогуур үезинде айыыл чок болурунуң хемчеглерин чорударын кыйгырып тур мен.

Бистиң хөмүрүвүстүң шынары үстелчек болганы-биле, печкаларны болгаш хоолайларны экидир аштап-арыглаары негеттинер. Сөөлгү айыыл-халаптың болганы ук дүрүмнерни херексевейн турарывысты чугаалап турар.

Өрт болгаш угарлыг газтың хоразындан болуп турар айыыл-халаптарны нептеретпези-биле, кылып чорудуп турар эң-не ажыктыг арга – ыш болгаш газтан алгыра бээр тускай херекселдерни одаар бажың бүрүзүнге салыры”.

Тываның Баштыңы В. Ховалыгның даалгазы-биле ТР-ниң Күш-ажыл болгаш социал политика яамызы чиигелделиг категорияның хамаатыларынга шак ындыг херекселдерни салып бээр талазы-биле ажылды кылып чорудуп эгелээн.

Бо чылын ниитизи-биле 758 амыдыралы чегей, хөй ажы-төлдүг, кадыы кызыгаарлыг ажы-төл азырап турар өг-бүлелерге холушкак хевирниң херекселдерин салыр.

2018 чылдан тура республиканың социал камгалалы чок хамаатыларга 1300 ыш илередир херекселдерни салган.

/ Күш-ажыл болгаш социал политика яамызының медээлеринден.