Март 6-да найысылал Кызылдың Бай-Хаак кудумчузунда удавас ажыттынар 19 дугаар школага ада-иелерге болгаш уругларга ажык эжиктер хүнүн эрттирген. 800 олуттуг чаа өөредилге чери Россияның Президентизи Владимир Путинниң эгелээни “Өөредилге” национал төлевилел-биле туттунган.
Чаа школаның ажыттынарын школачылар, ада-иелер база башкылар четтикпейн манап турар. Кызыл хоорайның школаларында олуттарның чедишпези нарын айтырыгларның бирээзи апарган. Өскээр чугаалаарга, бир школага 800 өөреникчи өөренир турган болза, ам ында уруглар саны 2 муң четкен. Ынчангаш национал төлевилел-биле республикада хары угда элээн каш школа тудуу доостур четкен. Оларның аразында Бай-Хаак кудумчузунда 19 дугаар школа март 11-ден эгелеп ажылын эгелээр.
“Ада-иелеривиске болгаш өөреникчилеривиске ажык эжиктер хүнүн эрттирдивис. Бир дугаарында школаның дугайында таныштырдывыс. Ооң соонда школаның эң-не онзагай солун кабинеттерин көргүзүп, экскурсияны чоруттувус. Школавыста ниитизи-биле 34 класс бар, оларның 14-ү эге класс өөреникчилери. Артканы ортумак болгаш улуг школа” – деп, школаның директору Наталья Новикова чугаалаан.
Келир неделяда, март 11-ниң хүнүнде, чаа школага өөреникчилер өөренип эгелей бээр. Ынчангаш ооң мурнунда ада-иелер болгаш өөреникчилер класс шактарын эрттирип, башкылары-биле ужуражып, оларның-биле чоок билчип, школаны эргий кезип, сонуургааны ол.
Кызыл хоорайның өөредилге талазы-биле департаментизиниң даргазы Лариса Куулар келгеннерге байырын чедирип, бо школа өске школаларга бодаарга, онзагай ылгалдыг дээрзин тайылбырлаан: “Бо школаны “Профлидер” деп адааны анаа эвес. Чүге дээрге маңаа өөреникчилер 1-ден 11 класска чедир баш удур боттарының келир үеде мергежилин шилип, школа соонда кайнаар дужаап кирер, кандыг эртемнерге шылгалдалар дужаарын билир болурлар”.
Школаның хуралдаар залынга школаның дугайында таныштырган соонда, келгеннерни башкылар эдертип алгаш, өөредилге черлериниң кабинеттерин кезип, мергежил аайы-биле тускай кабинеттер барын көргүзүп, амгы үениң негелделеринге дүгжүп турарын база көргүскен. Найысылалдың өске школаларындан ылгалып турар база бир онзагай чүүлү кадыы кызыгаарлыг уругларга пандустарны болгаш лифтилерни тургусканы кончуг эки.
“Бис бо школаның ажыттынарын дендии-ле манап турган бис. Амгы үениң негелделери-биле чүмнеттинген чаа школага ажылдаар болганывыска сеткилимден өөрүп тур мен. Эрткен неделяда изиг күзеливис-биле көжүп келдивис. Кабинет бүрүзүнде бүгү-ле дериг-херексел бар” – деп, школаның социал-психологтуг албанының эргелекчизи Виктория Ноокай өөрүшкүзүн илереткен.
Ажы-төлүнүң мындыг тускай школага өөренир аас-кежиктиг болганын ада-иелер демдеглеп, аңаа аажок өөрүп турарлар.
Бо чылын Вавилин ээтпээнде чаа школа тудуу база дооступ, удавас ажылын эгелээр. 2025 чылда “Спутник” микрорайонунуң Магистральная кудумчузунда ОБЯ-ның өрт кезээниң дужунга, ол ышкаш “Мөңгүн” микрорайонунга чаа школалар ажыттынар.
Чыжыргана СААЯ.
«ШЫН» №18 2024 чылдың март 9