Кызылдың «Сылдысчыгаш» салым-чаяанныг уруглар төвүнге республиканың ортумак профессионал өөредилге черлерин кызыл дипломнар-биле дооскан сургуулдарны хүндүткеп байырлаар хемчег болган.
Бо чылын ортумак профессионал өөредилге черлерин 3210 сургуул доозуп турар. Оларның аразында 234 уруг өөредилгезин тергиин эки демдектерлиг дооскаш, кызыл дипломнарны холунга алган.
Байырлыг хемчег үезинде ТР-ниң Өөредилге яамызының, Республиканың ветеринария төвүнүң, ТР-ниң Кадык камгалал яамызының, «Биргилерниң шимчээшкини» аныяктарның хөй-ниити агымының төлээлери база сургуулдарның башкылары, ада-иелери доозукчуларга байыр чедирип үделгениң чагыг сөстерин чугаалаан.
Өөредилге сайыды Елена Хардикова доозукчуларга байырын чедирип тургаш, олар ам ортумак эртемниг, аңгы-аңгы адырларга ажылдап болур специалистер болганын чугаалаан. Республиканың хөгжүлдезинге тускай эртемниг кадрлар, ылаңгыя ортумак профессионал специалистер эң-не херек дээрзин дыңнаткаш, баштай арга-дуржулга кирип ажылдавышаан, дээди эртемни чедип алырын ол сүмелээн.
— Бөгүн мында 80 хире доозукчуга байыр чедирип турарывыс бо. Олар дээрге техникумнарны чүгле кызыл диплом-биле дооскан эвес, а спортчу, культурлуг, хөй-ниити хемчеглериниң идепкейжилери болгаш янзы-бүрү мөөрейлерниң киржикчилери-дир. Доозукчуларны аңгы-аңгы адырлар аайы-биле ажыл-агыйга тургузары — бөгүнгү хемчегниң бир кол сорулгазы. Чүге дизе олар ортумак эртемниң дипломун холга алган, эртенги хүнден эгелээш, аңгы-аңгы адырларга ажылдап болур аныяк специалистер-дир. Мониторинг езугаар алырга, сургуулдарның хөй кезии улаштыр дээди эртем чедип алыр сорулгалыг. Ол база эки болбайн канчаар, ындыг-даа болза арга-дуржулга кирип ажылдавышаан, дээди эртемни чедип алыры база артык эвес.
Холдарында кызыл-кызыл дипломнар туткан, арыннарында өөрүшкү чайнаан сургуулдар боттарының өөрүшкүзү-биле үлешкен.
Тываның көдээ ажыл-агый техникумунуң доозукчузу Чыжыргана Монгуш школага өөренип тургаш-ла мал эмчизи болур күзелдиг турган: «Кызыл дипломну холумга алганымга өөрүп тур мен. Дипломнуң өңүнде-даа эвес, кол чүүл— күзээн мергежилин эки өөренип алгаш, сеткилинге тааржыр ажылга ажылдаарында деп бодаар мен.
Өөредилгемге бергедээшкиннер турбаан. Иркутск хоорайга улаштыр дээди эртем чедип алыр сорулгалыг мен. Дээди өөредилге черин доозуп алгаш, мергежилимниң аайы-биле ажылдаар күзелдиг мен».
Кызылдың Транспорт техникумунуң юрист мергежилин кызыл диплом-биле дооскан Аржаана Борбак башкыларынга четтиргенин илереткен: «Ынак башкыларым Хандымаа Феликсовна Шагдырга, Мая Михайловна Манайтарыга, Шеңне Күдеровна Монгушка, кураторум Долаана Михайловна Монгушка база Алдынай Михайловна Монгушка мени деткип, өөреткени дээш улуу-биле четтирдим».
Эльтона Кара-Хунаевна Ээдем уруу Аэлитаның өөрүшкүзүн үлежип, деткип келген: «Бир оолдуг, ийи кыстыг мен. Хеймер кызым Аэлита Кызылдың транспорт техникумун кызыл диплом-биле доозуп турар. Бөгүн уруумну деткип келгеним бо. Сеткилимден өөрүп тур мен. Уруум Кызылдың 15 дугаар лицейин чедиишкинниг дооскан. Ол школага-ла өөредилгези эки турган. Үргүлчү эки өөрензин деп чагып-сургап турган мен, чаңгыс кичээл-даа үспес, дыка кызымак кижи. Өөредилгезин уламчылап, дээди эртем чедип алырын күзеп турар бис. Уруум Москва хоорайга бо мергежилиниң аайы-биле дээди өөредилге черинче дужаар.
Техникумунуң башкыларынга, ылаңгыя группазының башкызы Елена Васильевнага бистиң ажы-төлүвүстү карактап, деткип, эртем-билигге чедирип кааны дээш ада-иелерниң болгаш өг-бүлевистиң мурнундан четтиргенимни илередир-дир мен».
А. СОЯН.
Авторнуң тырттырган чуруктары.
“Шын” №48 2024 чылдың июнь 29