Бо конфеталарны чылыы-биле чиирге, дыка чаагай.
Херек чүүлдер: 500-700 грамм аштааш, дөрбелчинней доорап каан тыква; 20-30 грамм ак саржаг (сливочное масло); шымчым дус; ½ бичии омааш ишти хоюг корица; 1-2 улуг омааш ишти ары чигири азы чигир пудразы; 1-2 бичии омааш ишти чигир (тыква чигирзиг эвес болза холуп ап болур).
Ол ышкаш 2-3 улуг омааш хоюдур соктап каан тоорукту, 1-2 бичии омааш лимон чулуун холуп ап болур (бо чүүлдер чокка-даа кылып болур).
Белеткээри: сковороданы ортумак отка изиткеш, ак саржагны эргискеш, доорап алган тыкваңарны, шымчым дузуңарны каапкаш, былгавышаан, 6-8 минута дургузунда ногаа чымчагыжеге чедир хаарыптыңар.
Белеткеп алган корицаңарны болгаш чигириңерни (чигир немевейн барып болур) 2-3 минута дургузунда былгавышаан быжырып туруңарда, карамель ышкаш апаарга, болу берген чемиңерни өске тавакче каапкаш, кырынче ары чигирин кудуптуңар азы чигир пудразын дескилештир чажыпкаш, оожум былгаар. Сооткаш, ол-ла хевээр столга салып болур силер. Бир болза тускай амдан киир хоюдур соктаан тоорукту азы лимон чулуун чажып ап база болур.
Амданныг болгаш кандыг-даа хора чок конфеталар белен.
Чурукрту интернеттен хоолгалаан.
«Шын» №41 2025 чылдың октябрь 23