Дүүн, сентябрь 24-те, Аныяктар ордузунга Улусчу фронтунуң Тывада салбыры ТШО-да тыва дайынчыларны деткиир сорулга-биле «Тылдан фронтуже! Шупту чүүлдү тиилелге дээш!» деп бирги ачы-дуза шуулганын эрттирген.
Аңаа республика девискээринде волонтерлар штабтары, күүсекчи эрге-чагырганың тѳлээлери, волонтерлар болгаш сонуургалдыг хамаатылар киришкен. Шуулганның байырлыг ажыдыышкынынга ТР-ниң Дээди Хуралының депутады Эрес Хуурак, 55-ки гвардейжи мото-адыгжы (даг) бригаданың лейтенантызы Артыш Чалбаа болгаш «Кызыгааржы» ВИА киришкен. ТШО-да маадырларны деткиири-биле кожууннар болгаш Кызыл хоорайда волонтерлар штабтары ТШО-же чорудары-биле кылып турар янзы-бүрү кылыгларының делгелгезин болгаш ярмарказын организастаан. Аңгы-аңгы шѳлчүгештерге камгаланыр четки ѳрүүрүнге, тепловизордан камгалаар шуглак даараарынга, дүрген чиптер кургаткан ногаалыг, эъттиг мүн чемин хаптаарынга, каска иштинге кедер эптиг бѳрт аргыырынга мастер-класстарны болгаш күзелдиг хамаатыларны Добро.рф сайтызынга бүрүткээр ажылдарны кылып чоруткан. Кирген орулгазы-биле ТШО-га херек чүүлдер садып алыр сорулгалыг янзы-бүрү суй белектерни база садып-саарган.
Шуулганның база бир кол сорулгазы республиканың аңгы-аңгы булуңнарында ажылдап турар волонтерларны чаңгыс черге чыып, мѳѳңнеп, бот-боттарының аразынга арга-дуржулгазын солуштуруп, ажыл-ижин таныштырары болур. Волонтер деп тускай деңнелди албан ёзузу-биле чедип албаан, ол хирезинде ТШО-нуң эгелээн үезинден тура амга чедир сеткилинден дузалажып чоруур биче сеткилдиг кижилерни Добро.рф сайтыга Аныяктар яамызының специалистери бүрүткеп турган. Бүрүткел эрткен хамаатыларның эң улуу-ла 67 харлыг.
Кожуун бүрүзүнде тургустунган волонтерлар шимчээшкининиң ажылын системажыдып, ажыл-чорудулганы эптиг болгаш шын кылдыр чорудар аргаларны айтып берип, Улусчу полкта ѳѳредип, уштап-баштап турар. Чүгле кожууннар тѳптеринге эвес, харын-даа суму бүрүзүнге, ылаңгыя ѳѳредилге албан черлеринге, волонтерлар штабтары тургустунуп, Ада-чурт камгалакчыларынга улуг деткимчени кѳргүзеринге күштү улгаттырып, мѳѳңнээри негеттинип турарын Улусчу фронтунуң Тывада салбырының удуртукчузу Саима Далчин демдегледи. Бо талазы-биле Улуг-Хем кожуун кончуг эки ажылдап турар, кожууннуң суму бүрүзүнде волонтерлар штабтары бар. Каа-Хем, Тожу кожууннар база мурнуку одуругда.
Шуулганның киржикчилери бедик кѳдүрлүүшкүннүг, бот-боттарындан хѳй чаа чүүлдерни билип ап, аразында дуржулгазын солчуп, ажыктыг чүүл кылып чоруурунга сагыжы ханып, фронтуже ээлчеглиг чүъгүн чорудары-биле тараан.
Н. КУУЛАР.
“Шын” №73 2024 чылдың сентябрь 25