Октябрь 22-де Москваның Улуг театрынга Россияның Театр ажылдакчыларының эвилелиниң тургустунганындан бээр 150 чыл ою болгаш Х шуулганынга тураскааткан байырлыг хурал болуп эрткен.
Аңаа РФ-тиң Президентизи В. Путин киришкеш, театрның салым-чолу болгаш ооң байлак чаңчылчаан аргаларын кадагалап арттырарынга уран чүүл ажылдакчыларының ниити харыысалгазының хевээр артары чугула дээрзин демдеглээн. «Россияда чүс-чүс профессионал театрлар күрүне деткимчезин ап турар. Делегейниң кайы-даа чуртунда ындыг чүве чок. Театр – чаңчылчаан үнелелдерни салгалдан салгалче дамчыдып бээринге база бир кол институт болуп турар. Аныяк салгалдың чүрээнче, сагыш-сеткилинче силер чүнү киирер силер – Россияның келир үези шак-ла ындыг болур” – деп, Владимир Путин чугаалаан.
Тывадан культура сайыды Виктор Чигжит биле Тывада театр ажылдакчыларының эвилелиниң регионалдыг салбырының даргазы, В. Көк-оол аттыг Национал хөгжүм-шии театрының артизи Уран-оол Стал-оол киришкен. Юбилейлиг шуулганның 195 делегады эвилелдиң эрги ады – Россияның театр ниитилели кылдыр эде адаар шиитпирни хүлээп алган. Ооң даргазынга Владимир Машковту 5 чылда соңгаан. Валерий Гергиев оралакчызы болган.
Россияның театр ажылдакчыларын каттыштырган улуг болуушкуннуң байырлыг концерт программазынга “Тыва” ансамбли киришкен. Улуг театрның оркестри, хору-биле чергелештир Тываның хөгжүмнүг аас чогаалы аңаа диңмиреп, чыылганнарга аян туткан.
Бистиң корр.
ТР-ниң Культура яамызының медээзи болгаш чуруу.
«Шын» №42 2026 чылдың октябрь 29
"Шын" солуннуң МАХ-каналынга каттыжыңар: max.ru/channel_shyn