Тыва 2026 чылда «Аныяктарга регион» деп федералдыг программа езугаар ук төлевилелди боттандырар. Чурттакчылыг ийи черде — Сарыг-Сеп биле Мугур-Аксынга амгы үениң аныяктар төптери туттунар. Бо төлевилелдерниң онзагай чүүлү - оларны куруг черден эвес, а октаттынган тудугларга улуг септелгени кылып, боттандырар. Сарыг-Септе эрги автовокзал орнунга аныяктар төвү туруптар. Мугур-Аксы суурда шагда башкыларның ниити чуртталга бажыңы турган оран-саваны эде чаартыр.
Ак-Довурак хоорайга төлевилелди шенеп ажылдадыры бүдүн чуртка чедиишкинниг болуушкун болур. Аңаа аныяктар төвүнүң модульдуг оран-савазын тудар Аныяктар херектериниң талазы-биле федералдыг агентилелге республиканың саналдааны ук эгелээшкин 15 муң чедир чурттакчылыг биче хоорайларга чедимчелиг шиитпир кылдыр долу деткимчени алган. Чаа аныяктар ордузу «Өлчей» школазы биле 2 дугаар школаның чанынга эптиг черни ээлээр.
Аныяктар төптери амгы үениң чаа техниказы болгаш эт-севи-биле чепсеглеттинер. Өрээлдерни хөй талалыг ажыл-чорудулгалыг зоналарга чарар:
* хөгжүм болгаш танцы студиялары;
* чогаадыкчы чорук болгаш кады ажылдажылга шөлдери;
* дыштаныр болгаш хостуг үе эрттирер зоналар;
* амгы аныяктарның хереглелдерин хандырар өске-даа шөлдер.
Аныяктар төптеринге «Баштайгыларның шимчээшкини», «Россия – аргалар чурту», «Билиг», «Добро.рф»-биле кады ажылдажылга булуңнарын база шөлдерин организастаар.
Ооң-биле чергелештир республиканың найысылалында аныяктарның кол шөлү - «Аныяктар ордузу» база чаарттынар. Ол черни сонуургалдарының аайы-биле аныяктарны сорунзалай тыртар төп кылдыр хуулдуруп, агар септелге ажылдарын планнаан.
Төлевилел боттандырылгазы-биле республиканың аныяктар политиказының экосистема хайгараалын чорудуп, муниципалитеттер специалистериниң билиг-мергежилин бедидер курстарны болгаш арга-дуржулгазын бедидер стажировкаларны эрттирери чугула.
Бо программа инфраструктура чаартылгазы-биле бүгү республикада аныяктар политиказын комплекстиг сайзырадырынче, адырның кадр курлавырын болгаш аныяктарның бот-идепкейин хөгжүдеринче угланган.
Россияның шупту регионнары киришкен «Аныяктар болгаш уруглар» национал төлевилел боттандырылгазы-биле эртип турар Росаныяктарның мөөрейинге Тыва тиилээнин сагындыраал. Тываның Чазааның кииргени аныяктар политиказын хөгжүдер комплекстиг программазы эң экилерниң бирээзи кылдыр шылгарап, федералдыг бюджеттен 100 сая рубльдиң субсидиязын алган.
ТР-ниң Чазааның парлалга албаны.