Тыва арга-дуржулгалыг депутат Юрий Кара-оол-биле байырлашкан

«Бөгүн хөй-ниитиниң болгаш политиканың лидери, республиканың парламентизиниң кежигүнү болгаш «Дайынчы акы-дуңмалышкы» хөй-ниити организациязының удуртукчузу Юрий Валерьевич Кара-оолду сөөлгү оруунче үдедивис. Ол Россияның болгаш төрээн Тывазының ёзулуг патриотчу оглу болуп, шериг офицериниң, хөй-ниити ажылдакчызының чуртталгазын төлептиг чурттап эрткен. Юрий Кара-оолович Афганистанга интернационалчы хүлээлгезин алдарлыы-биле күүседип, дайын-чааның бүгү-ле бергелерин дидим, шыдамык чоруу-биле ажып эрткен. Дайынчы эш-өөрүн деткиири-биле идепкейжи турушту ээлеп, Каа-Хем кожууннуң хөгжүлдезинге улуг үлүг-хуузун киирип, хөй арат-чонга ачы-дузазын кадып чораан.

Ол меңээ болгаш үргүлчү кады аралажып чораан чонунга республикавыстың кезээ мөңгеде патриоду, билдилиг хамаатызы, идегелдиг өңнүү болуп артар.

Юрий Валерьевичиниң дугайында чырык сактыышкыннар бистиң сагыш-сеткиливиске кезээ мөңгеде артар!» - деп, республиканың удуртукчузу Владислав Ховалыг бодунуң социал четкилерде хууда арынында бижээн.