Республиканың Баштыңы Владислав Ховалыг Тыва Республиканың Чазааның кежигүннери, күүсекчи эрге-чагырга органнарының удуртукчулары, тус чер чагыргаларының киржилгези-биле эрткен Аппарат хуралының үезинде Чаа чылдың узун байырлалдарында хөй-ниитиниң корум-чурумун хандырарының болгаш кем-херек үүлгедиишкиннерин болдурбазының талазы-биле элээн каш даалгаларны берген. Республиканың Баштыңы кел чыдар узун дыштаныр хонуктар дүрген дуза албан черлеринден, корум-чурум камгалаар органнардан, күрүне албан черлеринден күжениишкиннерни негеп турар айыылдыг үе-дир деп демдеглээн.
Владислав Ховалыгның айтыышкыны-биле Тыва Республиканың Чазааның Даргазының оралакчызының хүлээлгезин күүседип турар Шолбан Сендашка баштаткан оперативтиг штабты республикада тургускан. Росгвардия болгаш улусчу дружиналарның немелде күштерин киириштирбишаан, чурттакчылыг черлерни кежээки болгаш дүнеки үелерде хайгаараар. Оон аңгыда муниципалдыг районнарга участок шагдааларының, назы четпээннер инспекторларының болгаш социал ажылдакчыларның киржилгези-биле “айыылдыг бөлүкте” өг-бүлелерни болгаш ондактыг адрестерже ведомстволар аразының рейдилерин организастаар.
«Айыылдыг бөлүкке» хамааржыр өг-бүлелер болгаш уруглар-биле ажылды күштелдирип, оларның хайгааралын шыңгыырадыр, Чаа чылдың хемчеглеринче оларны хаара тударын хандырар даалганы салган мен. Байырлалдар үезинде хайгаарал чок артып калган уруг дээш кижи бүрүзү харыысалгалыг» - деп, Владислав Ховалыг бодунуң телеграм-каналынга дыңнаткан.
ТР-ниң Одалга болгаш энергетика яамызы кышкы үеде амыдырал-хандырылга объектилериниң үзүктел чок ажылдаарын хандырар дээш, муниципалдыг тургузугларда боттарының чылыг болгаш чырык хандырылга объектилеринде хөмүрнүң курлавырларын хүннүң-не хынаар. Одалга болгаш энергетика яамызы одаар чүүл складтарында чурттакчы чонга садып-саарары хөмүрнү доктаамал хандырар даалганы алган.
Тываның Баштыңы республиканың Иштики херектер яамызы-биле ажыл-чорудулганың чамдык хевирлеринге лицензия бээр албаны-биле кады араганы хоойлуга удур садарын болдурбазы-биле, рейдилер болгаш хыналдалар санын көвүдедир даалганы берген.
Эмнелге албан черлери, ылаңгыя травмпунктулар болгаш уруглар салбырлары, аарыг кижилерни хүлээп алырынга кезээде белен болур ужурлуг.
«Ылаңгыя ада-иелерге ол дорт хамааржыр. Чаа чылдың байырлалдарын ажы-төлүвүске болгаш чоок улузувуска чылыг, өөрүшкүлүг, айыыл чок эрттирери чугула" – деп, Владислав Ховалыг угаан-медерелдиг болгаш харыысалгалыг болурунче республиканың чурттакчыларын база кыйгырган.
ТР-ниң Чазааның парлалга албаны.