Санкт-Петербургтуң Л. Якобсон аттыг күрүнениң академиктиг балет театрының артизи, бистиң чаңгыс чер чурттуувус Геннадий Ооржак эң-не авторитеттиг XV Делегей чергелиг балет артистериниң мөөрейинге шылгарааннар аразынче киргеш, Хүндүлел бижик-биле шаңнаткан.
Делегей чергелиг бо мөөрейге киржир эргени алган эң-не дээрелерниң аразындан ылгалып үнери белен эвес дээрзин балет артистери шупту билир. Ону анаа-ла мөөрей эвес, чогаадыкчы улуг шуулган, уран чүүлдүң Олимпиадазынга деңнеп турар. 2026 чылда кажангызындан артык хөй – 35 аңгы чурттан 362 балет артизи киришкеш, мөөрейниң деңнелиниң бедиин бадыткаан.
Мөөрейниң жюри кежигүннеринче делегейниң сураглыг балет сылдыста- ры – российжи болгаш даштыкыдан алдаржаан балетмейстерлер, артистер, хореографтар болгаш билдингир театр труппаларының удуртукчулары, хүндүткелдиг башкылар кирген.
Аныяк балет артизи Геннадий Ооржак бодунуң уран чогаадыкчы шынарының бедиин көргүзүп, тергиин балет артизи дээрзин бадыткаан. Ооң сценага оюн-көргүзүү ёзулуг академиктиг школаны эрткен, тергиин техникалыг мергежээн балет артизи дээрзинге кандыг-даа чигзиниг бербээн.
Хамыкты магадаткан балет артизи Геннадий Ооржак Ак-Довурак хоорайга 2000 чылдың июнь 11-де төрүттүнген. Ол 2020 чылда Санкт-Петербургтуң Орус балет академиязын (Алексей Ильинниң клазы) доозуптарга, Самараның опера болгаш балет труппазы хүлээп алган. Шериг албанын эрткен соонда, 2022 чылдан тура Санкт-Петербургтуң Леонид Якобсон аттыг күрүнениң академиктиг балет театрының артизи болуп, чогаадыкчы ажыл-ижин уламчылап турар. Ол дараазында балет партияларынга ойнаан: “Лебединое озеро» (Шут), «Щелкунчик» (Классиктиг трио, Кыдат танцы, Паяц, Черт), «Озорные частушки» (хореограф — В. Самодуров), «Дон Кихот».
Россияның улуг хоорайында Тывазын алдаржыдып, республиканың чурттакчыларының чоргааралын оттурган аныяк салым-чаяанныг балет артизиниң чедиишкиннери моон-даа соңгаар хөй болзун!
/ Бистиң корр.
Чуруктарны болгаш медээни ТР-ниң Культура яамызындан алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/channel_shyn