Эрткен неделяда Москвага немелде болгаш школа назыны четпээн уруглар өөредилгезиниң адырларында башкыларның «Мээң тергиин кичээлим» деп бүгү-российжи профессионал шылгалда мөөрейиниң төнчү кезээ болуп эрткен. Мөөрейге чурттуң 40 регионундан 182 башкы киришкен. Тывадан Ак-Довурак хоорайның 1 дугаар школазының башкызы Тайгана Сегбе «Немелде өөредилге» деп угланыышкынга бирги черни чаалап алган.
Республиканың Баштыңы Владислав Ховалыг бедик деңнелдиг профессионал мөөрейге тиилээни дээш, тыва башкыга байырны чедирип, ооң чедиишкини регионнуң чоргааралы-дыр деп демдеглээн.
«Бистиң чаңгыс чер чурттуувус, Ак-Довурактан башкы Тайгана Сегбеге «Мээң тергиин кичээлим» деп Бүгү-российжи мөөрейге чайынналчак тиилелгези дээш сеткилим ханызындан байыр чедирип тур мен! Тываның башкылары федералдыг деңнелде бедик деңнелди тудуп шыдаар болгаш, боттарының мергежилиниң ёзулуг мастерлери дээрзин бадыткааннар. Башкы бүрүзү бодунуң мергежилинде сагыш-сеткили-биле бердинген ажылдап чоруур, ол дээрге Тываның келир үезиниң үндезини-дир» — деп, республика Баштыңы бодунуң телеграм-каналынга бижээн.
Республиканың Баштыңы Тайгана Сегбениң үлегер-чижээнден бүдүн республикада коллегаларын сорук киирер дээрзинге бүзүрелин илередип, а эрге-чагырганың туружу – башкыларның профессионал ажыл-чорудулгазының сайзыралынга байдалдарны ам-даа тургузары дээрзин айыткан, чүге дизе «… шыырак, тура-соруктуг башкыдан шынарлыг өөредилге эгелээр».
Тайгана Сегбе Д.И. Менделеевтиң өнчү-салгалын камгалаар фондунуң «Өөредилге чорудуунга ажыл албаны дээш» деп медаль-биле база шаңнаткан. Бо шаңналды 20 ажыг чыл стажтыг башкыларга өөредилгени хөгжүдеринге үр чылдарда киирген үлүг-хуузун демдеглеп тыпсыр. Тайгана Аясовнаны «Педагогикада дебют» деп номинацияга шаңнаан.
Бистиң корр.
Чурукту ТР-ниң Чазаандан алган.
“Шын” №3 2026 чылдың январь 29