Тываның эрге-чагыргазы Кызыл – Улан-Батор маршрудунга 2025 чылда бир дугаар ажыттынган делегей чергелиг авиа аргыжылга оруун ам-даа хөгжүдер сорулгалыг. Бо неделяда республиканың Чазаа ужудуушкуннарны чорудар «КрасАвиа» авиакомпанияның чидирген орулгазын дуглаары-биле регионалдыг бюджеттен субсидияны аңгылаар шиитпирни хүлээп алган. Авиабилеттер өртээн чиигедиринге субсидия дузалаар болгаш, эң чиик өртектиг билеттер 12 муң рубльден эгелээр.
Кызыл – Улан-Батор – Кызыл аразынга ужудуушкуннар май 7-де эгелээш октябрь 2-де доостур ужурлуг. Беш айның дургузунда ниитизи-биле 23 аай-дедир ужудуушкуннар планнаттынган, самолетту ортумаа-биле 72 хуу долдуруп, 1426 пассажирлерни аай-дедир аргыштырар. 40-ден 50 чедир пассажир олуттуг, ортумак ыракшылдыг АТР-42 самолеттар маршрутка ужар.
Тываның Транспорт яамызының дыңнатканы-биле алырга, 2026 чылдың республика бюджединде Кызыл – Улан-Батор – Кызыл делегей чергелиг авиамаршрутту субсидиялаарынче 30,2 млн рубль көрдүнген, бир аай-дедир ужудуушкун бүрүзүнге 1,3 млн. Туристерни хаара тудуп, оларның таарымчалыг байдалын хандырар дээш, Улан-Батордан өске черлерже, ооң иштинде Сеул, Токио, Пекин, Гонконг болгаш өске-даа угланыышкыннарже коштуна бээр рейстерже олуттарны броньнаары көрдүнген.
2025 чылда «КрасАвиа» бир-ле дугаар Тыва биле Моолдуң найысылалдарының аразынга 761 пассажирни аргыштырган 11 аай-дедир рейстерни кылганын сагындыраал. Республика ону чедип алыр дээш, узун болгаш берге орукту эрткен. Чугула дериг-херекселдерлиг, чаа ужудуп-хондурар шөлдүг кылдыр чаарттынган Кызылдың аэропорту 2018 чылда ажыглалче кирген. Аэропорттуң оран-савазын чаартып, делегей чергелиг терминалды ажыдып, агаар эрттирилге пунктузун тургускан. Бо чылдың бирги кварталында Кызыл аэропортунга пассажирлер аргыжылгазы эрткен чылдың ол үезинге деңнээрге, 12 хуу өскен. Эрткен чылын аэропорт ниитизи-биле 147,7 муң пассажирлерни хандырган.
Бо неделяда Россияның экономиктиг сайзырал сайыды Максим Решетниковтуң баштааны делегация составы-биле Федералдыг авиация агентилелиниң удуртукчузунуң оралакчызы Наталья Андрианова Тывага келгеш, республикада авиа аргыжылганы хөгжүткенинге база аэродром инфраструктуразының эде чаарттынганын хынап чораан. Н. Андрианова аэропорттуң кол объектилерин кезип, ужудуп-хондурар шөлдүң байдалынче, техниктиг албан черлериниң ажылынче, пассажирлерге байдалдарны тургусканынче, ооң иштинде манаашкын залдарынче, бүрүткел эртер база чүъктү хүлээп-чүдүрер-хүлээдир системаже кичээнгейни угландырган. Пассажирлер шимчээшкинин чурумчудуп, айыыл чок чорукту экижидип болгаш ачы-дуза чедирилгезин дүргедедир дизе, ужуп чоруур болгаш ужуп келир пассажирлериниң үнер черлерин аңгылап, терминалды зоналаар арганы чугаалажып көрген.
Республиканың Баштыңы Владислав Ховалыг Тываның чурттар аразынга рейсти шиңгээткен баштайгы арга-дуржулгазы аэропорт инфраструктуразының шупту хевирниң самолеттарын хүлээп, оларны делегей стандарттарынга дүүштүр хандырарынга беленин болгаш арга-шинээ барын бадыткаан деп санап турар. Регионалдыг эрге-чагырга делегей чергелиг, ылаңгыя Кыдат, Казахстан болгаш өске-даа угланыышкыннарже дорт ужудуушкуннарның географиязын калбартырының аргаларын өөренип турар.