Абдуллаева (Шыхлинская) Афаг Сабир кызы — Афаг Шыхлы — эмчи, шүлүкчү, прозачы, публицист. Азербайджан, турк, орус дылдарда 9 номнуң автору, хөй санныг коллективтиг чыындыларда ооӊ чечен чугаалары, публицистиг чүүлдери парлаттынган.
Россияныӊ база Азербайджанныӊ чогаалчылар эвилелдериниӊ кежигүнү. Азербайджанныӊ журналистер эвилелиниӊ кежигүнү. Бүгү делегейниӊ чогаалчылар болгаш публицистер ассоциациязыныӊ кежигүнү.
2025 чылдыӊ июнь 27-30 хүннерде Тываныӊ чогаалчылар эвилелиниӊ «Чедер» курортка организастап эрттиргени Аныяк чогаалчыларныӊ III фестивалынче Афаг Шыхлы чаладып, Россияныӊ чогаалчылар эвилелиниӊ баштаар чериниӊ кежигүннери, чогаалчылар Валерий Латынин база Нина Попова-биле кады киришкен.
Афаг Шыхлы Сайлыкмаа Комбунуӊ шүлүктерин азербайджан дылче очулдуруп, аӊгы ном кылдыр парлаткаш, фестиваль үезинде чыылганнарга таныштырган.
Азербайджан чогаалчының шүлүктерин Россияның чогаалчылар эвилелиниң кежигүнү Мэңги Ооржактың очулгазынга номчуңар.
ТЫВА ЧЕРДЕ
Тыва черде бүгү чүве тускай, онза...
Мында даглар хуулгаазын,
салгын-хаттың уязы боор
Саяннар бар.
Мында хемнер анаа эвес,
эрте шагдан төөгүзүн шуудуп чыдар
Эне-Сай бар.
Мында Хемчик тоолун ыткан,
Улуг-Хеми чүрек-биле хөөннешкен.
Ак-Хөл, Дус-Хөл база Азас –
аккыр булут эштип чоруур күзүңгүлер.
Сарлык малы маажым оъттаан,
чоргаар көстүр.
Чаяачы хам таңды ээзин оожургадып
хөөрешкен,
Ыраажылар хөөмейлеп
ындынналган.
Мында эртенги ыш аразында
өглер көстүр,
өгбелерниң адыжында – черниң чуруу,
ында –
Тыва каптагайның хиндии, төвү.
Кызыл кода чүгле Азия төвү эвес,
Кыдыг, шыйыг белдирлери база эвес,
Салым-чолдар каттыжып кээр
чараш хоорай.
Хааннарның шынаазында базырыктар
Хаарыктап, удуп чыдар, ынчалза-даа
ол ыржым – бүгү сөстен артык ыыткыр.
Тыва черде ыржым-шыпшың,
дыңнаалаза, билип каар сен.
Удаан төлүн чассыдыксаан ие ышкаш
Кудай мында черже ээгип бады келген.
Тыва черде мөңге артар
Ыдыктар хөй!
Мэӊги ООРЖАК очулдурган.
Чурукту интернеттен хоолгалаан: yandex.ru/images/sea...
“Шын” №29 2025 чылдың июль 31