2022-2023 чылдарда Тываның чурттакчыларын элеп-самдараргаш, чурттаар арга чок апарган оран-савадан көжүреринче 213 сая ажыг рубльди үндүрүп бээр.
140 хире кижини чаа квартираларже көжүрүп киирери планнаттынган. Ук планны боттандырары-биле, 2022-2023 чылдарда Тываның чурттакчыларын амыдыраар арга чок апарган оран-савадан көжүреринче 213,68 сая рубльди үндүрүп бээр. Бо ажылды “Чурттаар оран-сава болгаш хоорай девискээри” деп национал төлевилелдиң аайы-биле республикада чорудуп турар.
Бо чылдың март 18-те Чуртталга-коммуналдыг ажыл-агый эде тургузарынга деткимче көргүзер фонд деп күрүне корпорациязының баштаар чери Тыва Республиканың “Чурттаар арга чок апарган оран-сава фондузун туруму-биле кызырарын хандырары” федералдыг төлевилелди боттандырарынга саң-хөө деткимчезин чедирер дугайында киирген чагыынга чөпшээрелди берген. Ук төлевилелдиң аайы-биле РФ-тиң субъектилеринде 2017 чылдың январь 1-ге чедир авария байдалында деп хүлээттинген чуртталга оран-савазындан көжүрер ажыл чоруттунуп турар дээрзин сагындырып каалы.
Ук чөпшээреп каан чагыг езугаар, Тыва ЧКА Фондузунуң акша-хөреңгизинден 213,68 сая рубльди алыр, оон аңгыда регионалдыг бюджеттен 2,17 сая рубль хемчээлдиг немелде акшаландырыышкынны чорудары көрдүнген. Ук акша-хөреңгиге бо чылын база келир чылын Чеди-Хөл кожууннуң Хову-Аксы суурунга ниити шөлү 2,26 муң дөрбелчин метр 50 чурттаар оран-саваны тудар. Ук бажыңнардан 138 хамаатылар чаа квартираларны алыр.
Эрткен чылдың октябрь айда Тываның Баштыңы Владислав Ховалыг күрүне корпорациязының баштаар чериниң даргазы-генералдыг директору Константин Цицин-биле ужурашкан турган. Ынчан ол ЧКА Фондузундан республикага чурттаар арга чок апарган оран-сава фондузундан чурттакчы чонну көжүрер талазы-биле программаны боттандырарынга чугула херек хемчээлдиг акша-хөреңгини үндүрүп бээрин дугуржуп алган. Тыва оон аңгыда Фонд-биле өске-даа угланыышкыннарда кады-ажылдажылганы чорудуп турар – социал чурттаар оран-сава тудуу, коммунал инфраструктураны модернизастаары. Республиканың 5000 ажыг чурттакчылары чаа, айыыл чок квартираларны бо үеге чедир алган.