2026 чылдың январь 1-ден эгелеп республикада төрүттүнген 74 дун чаштарның өг-бүлелери «Тыва чашка» деп белек түүн алганнар. 10 муң хире рубль өртектиг комплектиде чаа төрүттүнген өпеяага чугула херек арыг-силиг херекселдери, идик-хеп комплектизи база бичии орун бар.
«Ада-иелер губернатор белээнде кирген орунну баш бурунгаар ап алгаш, авазы-биле өпеяазын үндүр бижииринге чедир бажыңынга чыып, белеткеп ап болур» — деп, республиканың Кадык камгалал яамызы дыңнаткан.
Тываның Баштыңы В. Ховалыгның Айыткалын күүседири-биле «Тыва чашка» деп социал төлевилелди эгелээн. Ол аныяк ада-иелерни деткип, чаштарның чаагай чоруун экижидер ужурлуг. 2025 чылда дун төлү төрүттүнген 1288 өг-бүле белектерни алган.
Социал төлевилелге киржип турар дун чаштарлыг аныяк иелер чаа төрүттүнген уругларын аңгы орунга чыттырып өөредир ужурлуг. Чаш төлдүң кадыын болгаш амы-тынын камгалаарынче ол хемчег угланган. Эмчилерниң демдеглээни-биле алырга, чаш төл аңгы удуурга, ие кижи дыштыг болгаш эки удуур, а эң кол чүүл — уругга айыыл чок чорукту хандырар.
Бистиң корр.
Чуруктарны “Шын” солуннуң архивинден алган.
“Шын” №3 2026 чылдың январь 29