Тываның Баштыңы эрткен неделяда ТШО девискээринге ажыл-агыйжы сургакчылаашкынга чорааш, Төп болгаш Чөөн шериг округунуң аңгы-аңгы шериг кезектеринден тыва дайынчыларга техниканы болгаш автомобильдерни, ооң иштинде квадрокоптерлер база оларга эргежок чугула тускай херекселдерни чедирген.
Ол ажыл-агыйжы сургакчылаашкынче Владислав Ховалыг-биле катай Тывада Улусчу фронтунуң активчилери Эрес Хуурак биле Ужар-оол Иргит база чораан. «Деткимче» регионалдыг фонд чурттакчы чоннуң, улуг бүдүрүлгелер болгаш компанияларның, аңгы-аңгы албан черлериниң база меценаттарның деткимчези-биле саткан беш мотоциклди база ол хире квадроциклдерни кожуглары-биле катай, он-он квадрокоптерлерни болгаш генераторларны бистиң шериглерге дамчыткан.
Тываның Дээди Хуралының депутады, регионалдыг Улусчу фронтунуң кежигүнү Эрес Хуурак: "Ылап-ла улуг дуза херек-тир, гуманитарлыг деткимчеден эгелээш, читкен шериглерни дилээр ажылдарга чедир. Бо удаа Тываның Чазаа биле Улусчу фронт бистиң оолдарга тос машинаны, квадроциклдерни, камгалал четкилерин база оолдарның чагаан чүлдерин эккелдивис».
Донецк Улус республикада «Саур-Могила» деп кол мемориалдыг комплекске чүъктү дамчыткан. Аңаа-ла Тываның Баштыңы бистиң дайынчыларывыска шаңналдарны тывыскан.
Эр дайынчылар-биле кады Тывадан кыс уруглар база шериг херээн эртип турарын Тываның Баштыңы демдеглээн. «Оларның бирээзи — эмчи сестразы, ефрейтор Стелла Монгуш. Эрткен чылдың ноябрьда ол фронт шугумунга дайынчыларның амы-тынын камгалаары-биле Камгалал яамызы-биле керээни чарган. Чаңгыс чер чурттуумга эрес-дидим чоруу дээш «Тускай шериг операциязының киржикчизи» деп Тыва Республиканың медалын тывыстым» — деп, В. Ховалыг бодунуң блогунга бижээн.
«Бээр бистиң дайынчыларывыска дузалажыр дээш келген мен. Мурнуку одуругдан эккеп турар балыгланган дайынчылдарны хүлээп алгаш, эмнээш, Россияже эвакуациялап чорудуп турар бис. Бо мээң бир дугаар шаңналым-дыр. 137 дугаар бригаданың мурнундан республикавыстың Баштыңынга четтиргенимни илередир-дир мен» — деп, ол өөрүшкүзүн илереткен.
Ол хүн Тываның Баштыңы 97 дайынчыга шаңналдарны тывыскан. Шаңналдарның аразында Эрес-дидим чорук ордени база «Эрес-дидим чорук дээш» деп медаль база бар.
«Саур-Могила» мемориалдыг комплекс Донбасстың камгалакчыларынга, ол дээрге фронтунуң кандыг-даа точказында тулчуушкунга киржип турган бистиң чаңгыс чер чурттугларывыска тураскааткан. Ада-чурттуң Улуг дайынының үезинде маңаа улуг тулчуушкун болуп турган. Эрткен үениң дайынчыларының маадырлыг чоруу — ТШО киржикчилеринге езулуг эрес-дидим чоруктуң үлегери-дир» — деп, Владислав Ховалыг демдеглээн.
Даг гвардиязының 55-ки гвардейжи тускай мото-адыгжы бригадазының командири, полковник Сергей Карасев 55-ки бригаданы бир чыл чартык командылап турар. «Тыва дайынчыларның командылакчызы болуру меңээ чоргаарал-дыр» — деп, ол демдеглээн.
«Чүге дээрге оларның национал аажы-чаңын билипкен мен: ол дээрге коргуш чогу, ол дээрге күштүг күзел-соруу, ол дээрге күжү. Оларның өгбелериниң тураскаалдыг овур-хевири дириг. Ада-чурттуң Улуг дайынында тыва кавалержилер дыка-ла эрес-дидим тулчуп турган. Ам-даа болза неофашистер-биле тулчуп турар үеде ол-ла чүве катаптап турар: дайзыннар бистиң дайынчылардан дыка коргар»
ТР-ниң Чазааның парлалга албанының медээзинден.
"Шын" №59 2024 чылдың август 7