«Төрээн дыл болгаш төрээн чогаалдың тергиин башкызы» деп Бүгү-россия чергелиг профессионал мергежилдиң регионалдыг мөөрейиниң киржикчилеринге өөредиглиг семинар Кызылдың ийи дугаар школазының баазазынга болуп эрткен.
Семинарга 14 кожуундан (Мөңгүн-Тайга, Бай-Тайга, Барыын-Хемчик, Чөөн-Хемчик, Өвүр, Улуг-Хем, Чаа-Хөл, Каа-Хем, Бии-Хем, Тожу, Эрзин, Таңды) болгаш Кызыл, Ак-Довурак хоорайлардан 13 школа башкызы база 12 кижизидикчи башкы киришкен. Хемчегни Национал школа хөгжүдер институттуң ажылдакчылары организастап эрттирген.
Мөөрейниң эртер чуруму, негелделериниң талазы-биле тайылбырны институттуң филология лабораториязының эргелекчизи В.В. Монгуш болгаш школа назыны четпээн уруглар албан өөредилгезиниң методизи А.А. Монгуш чорутканнар.
Ол ышкаш 2023 чылда бир дугаар эрткен мөөрейниң республика иштинге тиилекчилери – Мугур-Аксы суурнуң Хамнаарак аттыг 5 дугаар школа назыны четпээн уруглар албан чериниң кижизидикчи башкызы Э.В. Донгак база Кызылдың 12 дугаар школазының тыва дыл, чогаал башкызы С.А. Монгуш боттарының арга-сүмелерин берип, Россия деңнелинге киришкен дуржулгазы-биле таныштырган.
Национал школа хөгжүдер институт.
“Шын” №15 2024 чылдың февраль 28