ТЫВАДА ЧИИГЕЛДЕЛИГ ИПОТЕКА ПРОГРАММАЗЫНЫҢ БОТТАНЫЛГАЗЫ АДАКТАЛЫП ТУРАР.
Ук программа 2024 чылдың июнь 30-ге чедир күштүг болур. Ындыг болзажок, улус-чоннуң ортузунда ук программаның нептереңгейжээни-биле Тыва Республиканың Чазаа ооң хуусаазын узадырының дугайында ажылды чорудуп турар.
Регионга тудуг-суурнуң нептерелинге болгаш хөгжүлдезинге чиигелделиг ипотека программазы хөлчок улуг рольду ойнап турар дээрзин төөгү эртемнериниң кандидады, ТР-ниң Чазааның чанында Гуманитарлыг болгаш социал-экономиктиг тускай шинчилелдер институдунуң директору Вячеслав Март-оол база экономика эртемнериниң доктору, ТывКУ-да экономика салбырының деканы Вячеслав Севек айтып турарлар.
«ТР-ниң Чазаа Тываның Баштыңы-биле кады дыка эки ажылдааннар-дыр. Бистиң чурттакчыларывыска чиигелделиг ипотеканың ажык-дүжүүнүң дугайында чижеглей сайгарып көрдүвүс. Кол нуруузунда ипотеканы 25 хардан эгелээш, 40–45 хар үезинде улус ап турар боор-дур. Ооң соонда 20 чыл хуусааның дургузунда өг-бүле бир сая хире рубльди артыкка төлээр. А кандыг-даа чиигелде чок ипотека болза, артыкка төлээри көвей. Кижи бүрүзү бодунуң оран-савазынга чурттаксаар, мындыг күрүне деткимчези бистиң өг-бүлелеривиске чедингир апарганы магалыг-дыр” — деп, Вячеслав Март-оол демдеглээн.
Чиигелделиг ипотека көстүп келирге республикага чуртталга оран-савазының тудуу оккур хөгжээн деп ТывКУ-да экономика салбырының деканы Вячеслав Севек чугаалаан. 2023 чылда Тываның төөгүзүнге туруп көрбээн көргүзүг чедип алдынган— 172,4 муң дөрбелчин метр чаа чуртталга оран-савазын туткан.
«2008 чылдан эгелеп чаа бажың-балгатты кол нуруузунда хамаатыларны бустур четкен бажың-балгаттан көжүрериниң азы өскүс уругларга оран-саваны тударының программазын ёзугаар тудуп турган. А чиигелделиг ипотека дээн чижектиг программалар чуртталга оран-савазының баштайгы рыногун шапкынчыдып турар” — деп, Вячеслав Севек демдеглээн.
Тывага чиигелделиг ипотека чээлилээшкининиң программазы Тываның Баштыңы Владислав Ховалыгның эгелээшкини-биле Россияның кошкак экономикалыг 10 регионунга боттанып эгелээн.
Тыва Республикага чиигелделиг ипотека программазы ажылдап эгелээнинден тура, ооң чурттакчылары «тыва» ипотеканы идепкейлиг ажыглап турарлар: ниитизи-биле 13 муң ажыг чагыгларны киирген, оларның 2 муңун чөпшээрээн.
А. ХЕРТЕК белеткээн.
Чурукту интернеттен алган
“Шын” № 45 2024 чылдың июнь 19