Тыва кавайга чайгадып өзер

Июль 2-де Кызылдың ХБАБ эргелелинге солун хемчег болган. Аңаа төрүттүнген дугайында херечилел кылдырар дээш, келген аныяк өг-бүлениң баштайгы төлү төрүттүнгени-биле тыва кавайны белекке берген.

Кызылда чурттап турар Сендажи биле Айлазат Санааларның аныяк өг-бүлезиниң дун уруу Виолеттага кавай культуразының Евразийжи “Кавайым сен. Кавай” фестивальдың организакчылары тускай чагыг ёзугаар мастерге кылдырган тыва кавайны белекке сөңнээн. Ол өг-бүлени ТР-ниң Юстиция яамызы сүмелээн.

“Биске шак мындыг онзагай белек – чаңчылчаан тыва кавайны алыры улуг хүндүткел болду. Тыва чоннуң шаг-шаандан тура эдилеп чорааны эдилелин – чаш уругнуң ыдыктыг “уязын” камныг эдилээш, дараазында салгалдарывыска дамчыдар бис” – деп, чаш уругнуң адазы өөрүшкүзү-биле үлешкен.

Республиканың Аныяктар өргээзинде ХБАБ эргелелиниң байырлыг залынга фестивальдың организакчыларындан аңгыда, чаа төрүттүнген чаштың кырган-авалары, кырган-ачалары, төрелдери чыглып, солун хемчегниң киржикчилери болган.

“Бо мээң 12 дугаар уйнуум-дур. Ол ам кончуг чараш тыва кавайга чайгадып өзер болганынга дыка өөрүп тур мен. Мен болгаш мээң үе-чергем тыва кавайга өскен бис. Боттарывыстың аймаавыстың шак ындыг кавайывыс кадагалаттынып артпааны, читкени харааданчыг-дыр”– деп, чаштың кырган-ачазы Сыргал-оол Санаа чугаалаан.

Тыва чон шаг-шаандан тура чаш ажы-төлүн чайгап өстүрер кавайын ыдыктыг эдилел кылдыр санап чораан. Ону чазап кылырда, чымчак материалды шилип тургаш кылыр. Ону долгандыр камгалалды азар чаңчылдыг турган. Ол чаңчылдар катап эглип эгелээни өөрүнчүг. Кавайга чаш уругну ийи харлыынга чедир чайгап өстүрер турганын сагындыраал.

Бистиң корр.
Буян ООРЖАКТЫҢ тырттырган чуруктары.

“Шын” №50 2024 чылдың июль 6