Тыва АССР-ниң алдарлыг чурукчузу Татьяна Левертовскаяның «Тыва кыс» деп чуруун дыка үр үе иштинде Барыын-Хемчик кожууннуң төвү Кызыл-Мажалык суурнуң Культура бажыңының ажылдакчызы Айлана Домур камныг кадагалап турган. Айлана Оолаковна чуруктуң кезек черлери тоглап эгелээрге, Алдан-Маадыр аттыг Национал музейге реставрациялаары-биле дамчыткан.
Тыва АССР-ниң Культура яамызы Барыын-Хемчик кожууннуң төвүнде Культура бажыңының байырлыг ажыдыышкыны болуп турар үеде «Тыва кыс» деп чурукту белекке берген.
Чурукта ак-көк даглар дөжээнде национал хептиг, холунда боодал чечек туткан аныяк кысты чуруп көргүскен. Чурукту этюд хевирлиг чураан. Аныяк кыстың овур-хевири чайгы изиг хүннүң салгынныг эзининде айыраңнаан кып-кызыл чечек ышкаш көстүр. Чуруктуң адаанда чурукчунуң бодунуң холунуң үжүү бар: «Тувинка". Т. Левертовская — 80 г.».
Левертовскаяның бийиринден үнген ажылдары – портреттер, Тываның ажыл-ишчи чону болгаш республиканың онзагай чараш бойдузу — музейниң фондузунда шыгжаттынган.
“Шын” №80 2023 чылдың октябрь 21