Төөгүлүг 1 дугаар делегейниң кыргыс “Курашка” база якут “Хапсагайга” чемпионнаттары август 21–26 хүннеринде Кыргыс Республиканың төвү Бишкек хоорайга болган. Аңаа 34 чурттан 172 мөге киришкен. Оларның аразында делегейниң 18 чемпиону киришкен.
Россияның чыынды командазынга Саха-Якутия, Бурятия, Тыва, Хакасия, Алтай болгаш Татар республикалардан шупту 24 мөге хүрешкен.
Бистиң республикадан 3 мөге киришкеш, шупту 3 дугаар шаңналдыг черже киргеннер. Кыргыс хүреш «Курашка» 95 килден аар мөгелер аразынга 2024 чылда Начын мөге деп атка төлептиг болган Улуг-Хемден Демир-Хая Самдан 3-кү черни алган. Дараазында хүнде якут хүреш “Хапсагайга” 57 кил чедир мөгелер аразынга Аким Куулар, 95 кил чедир Артыш Ооржак, 95 килден өрү аар килге Демир-Хая Самдан шупту 3 дугаар черни ап, хүлер медальга төлептиг болган.
Дуржулга солчулгалыг белеткел
Чадаанага авгус 22-ге чедир элээди мөгелер аразынга хостуг хүрешти сайзырадыр сорулгалыг арга-дуржулга солчулгазы болган.
Аңаа Якут-Саха Республикадан 8 мөге, 1 тренер киришкен. Белеткелдер соонда аалчыларга Чөөн-Хемчик кожууннуң төөгүлүг солун черлерин — Үстүү-Хүрээ база Ийме сумузунда элезинниг черни сонуургадып көргүскен.
А. ЧАМБАЛ-ООЛ.
“Шын” №67 2024 чылдың сентябрь 4