Тыва метеорит 20 чыл эрткенде

Март 19-та Тываның В. Көк-оол аттыг Национал театрынга Санкт-Петербург хоорайның сцена уран чүүлүнүң российжи күрүне институдунуң доозукчуларының юбилейлиг концерти болуп эрткен.

“Тыва метеорит” азы “норенкожулар” деп адап турарывыс театрның мөгейикчилеринге билдингир, ынак артистеривис чон мурнунга 20 чыл бараан болуп келгенин түңнээн оюн-көргүзүүн бараалгаткан. Ол чылдар дургузунда кайы хире өзүп, быжып келгенин тыва көрүкчүден аңгыда, шыңгыы көрүкчү – оларны өөредип, доостурган башкылары юбилейлиг концерттиң хүндүлүг аалчылары болуп чаладып, көрген.

Концерт эгезинде албан-ёзунуң байырлыг кезээнге ТР-ниң Чазак Даргазының оралакчызы Елена Хардикова сөс алгаш, ТР-ниң Чазааның Даргазы Владислав Ховалыгның болгаш Тыва Чазактың мурнундан юбилейин демдеглеп турар артистерге байыр чедирип, моон-даа соңгаар чогаадыкчы чедиишкиннерни күзээш, театр дээрге тыва национал уран чүүлдүң кавайы-дыр деп демдеглээн. 25 чыл бурунгаар Тывадан барган чалыы оолдар, кыстардан мындыг уран талантылыг артистерни кижизидип, оларга сценаның чажыттарын айтып берип, театр болгаш кино артизи мергежилди өөредип каан хүндүлүг башкыларынга Тываның чонунуң мурнундан четтиргенин илереткен.

Ол ышкаш чарлаттынган “Башкы болгаш дагдыныкчының” чылында болуп турар хемчегни онзагайлап демдеглээш, Тываның культура болгаш уран чүүлүнүң бедик мергежилдиг специалистерин белеткээринге киирген үлүг-хуузу дээш “норенкожуларның” чалап алган башкыларынга дараазында шаңналдарны тывыскан:
ТР-ниң Чазак Даргазының Хүндүлел бижии-биле Нина Бочкаревага, “Тыва Республиканың уран чүүлүнүң алдарлыг ажылдакчызы” хүндүлүг атты Елена Крушницкая, Людмила Прокопенко, Татьяна Селяниновага тывыскан.

“Тыва Республиканың мурнунга ачы-хавыяазы дээш” деп медаль-биле Владимир Норенкону шаңнаан.

Ийи кезектиг болган концертке “норенкожуларның” ойнаан шиилеринден монологтарны, студент чылдарында көргүзүп турган оюн-көргүзүглериниң видео бижидилгелерин болгаш уран-чечен фильмнерге ойнаан рольдарындан үзүндүлерни, хөйнүң болгаш чаңгыстың ыры-самын көрүкчүлер улуг сонуургал-биле магадап, изиг адыш часкаашкыннары-биле хүлээп көрген.

Ол-ла концерт программазының аразында башкыларынга улуг хүндүткелин илередип, театрның артистери боодал чечектер, белектерни сунганнар.

25 чыл бурунгаар Тывага кээп чорааш, хөй улус аразындан шилип алгаш, беш чыл дургузунда артист мергежилге өөредип каан “ажы-төлүнүң” 20 чыл сценага ажылдаан түңнелинде, бышкан улуг артистер болганынга Владимир Норенко өөрүп, моон-даа соңгаар чедиишкиннерни күзээн. “Дириг-ле чорзумза, Тывадан келген оолдар-кыстарны күзелдиим-биле хүлээп, бүгү ынакшылым берип тургаш өөредиринге белен мен. Силер бүгүдеге театрга ынакшылыңар дээш четтирдим!” – деп, башкы, режиссер, профессор, РФ-тиң, Хакас болгаш Тыва Республикаларның уран чүүлүнүң алдарлыг ажылдакчызы Владимир Васильевич чугаалаан.

/ Бистиң корр.