Кызыл кожууннуң хоорайжыткан Каа-Хем суурунда «Победа» спортчу-культура төвүнүң ажыдыышкынынга белеткел ажылдары кидин түлүк. Тывада чаа объект хары угда 4500 чедир көрүкчүлерни хүлээп алыр аргалыг эң улуг спортчу төп болур. Республикада спортчу инфраструктураны хөгжүдеринге болгаш спортчулар белеткээриниң деңнелин бедидеринге үлүүн киирип, российжи болгаш делегей чергелиг маргылдааларны эрттирер шөл апаар.
Тываның Баштыңы Владислав Ховалыгның даалгазы-биле республиканың яамыларының болгаш ведомстволарының, ол ышкаш Тываның Чазааның Аппарат ажылдакчылары комплекстиң иштики кезээнде тудуг боктарын арыглап, ооң чоок-кавы девискээрин чаагайжыдар ажылдарны хүннүң-не кылып турар. Аңгы-аңгы организациялардан 100 ажыг кижи хүннүң-не ол объектиде ажылдап турар.
Эрткен неделяда комплекстиң девискээринде ногаан өзүмнерни олуртуп дооскан. 380 хире санныг улуг хадыларны тараан.
Улуг Тиилелгениң 80 чылынга база Ада-чурт камгалакчызының чылынга алдар болдуруп адаан «Победа» төвүнүң үрде манааны ажыдыышкыны удавас болур. Владислав Ховалыг республиканың Дээди Хуралынга Айыткалынга спортчу объектиге ол атты тыпсыр шиитпирни хүлээп алганын дыңнаткан турган.
Спортчу-культура төвүнде волейбол, баскетбол, мини-футбол, гандбол, фитнес, стол теннизи болгаш аңгы-аңгы хүрештерге белеткенир байдалдарны тургускан. Ол ышкаш спорттуң универсалдыг хевирлеринге база белеткел өрээлдери бар.
Республиканың Спорт яамызының дыңнатканы-биле алырга, ноябрь эгезинде төптү ажыдары планнаттынган.
ТР-ниң Чазааның парлалга албаны.