Тыва поэзияның дээжизи

Александр ДАРЖАЙ
Тываның улустуң чогаалчызы

ЁЗУЛАЛ

Аткан даңны уткуп тура, мендилежир,
Ашкан хүннү үдеп тура, байырлажыр,
"Экии" болгаш "Байырлыг" дээн ёзулалдың
Аразында амыдырал оруу бар ийин.

Эртенгиниң хаяа чырыын уткуп тура,
Эчис-сорук күзелдерни бодап алгаш,
Аас-кежик оштап үнген чаа хүнче
Амыр-биле чолукшужуп, сүдүн өргүүр.

Баштак, хөглүг чугаалажып, куспактажып,
База катап душкужеге байырлыг деп,
Өңнүктерниң чылыг холун дыңзыг туткаш,
Өгже углай кежээликтей чаныптар бис.

Аткан даңны уткуп тура, мендилежир,
Ашкан хүннү үдеп тура, байырлажыр,
"Экии" болгаш "Байырлыг" дээн ёзулалдың
Аразында амыдырал оруу бар ийин.

"Шын" №27 2023 чылдың апрель 15