Юрий ТУН-ООЛ, Тываның чогаалчылар эвилелиниң кежигүнү.
Сонеттер
Шүглүп үнген сөстер дизии –
Шүлүкчүнүң делегейи.
Чүгүрүшкен сылдыс баштап,
Чүрээм ынаар чүткүдедир.
Чураан ышкаш чогаалдарны
Чула бижип чадашкан мен.
Сеткилимниң үүжезин
Сериин дүне ажытсымза.
Онза чараш, тывызыксыг
Одуруглар ойбас кылдыр
Чеченнерниң оранынче
Чечек сунуп, чалааш келийн.
Уран чогаал күштүг-ле-дир,
Ууп, чүктээр харыым бар бе...
18.07.2020.
* * *
Дүне, хүндүс бодалдарым
Дүвүредип, дыш-даа бербес.
Дооразындан соксаттынмес,
Долгандырган бөмбүрзек-ле.
Кыйып эртер белдир черде
Кызаңайнып, чивеңейндир.
Үвүреңнээн чычааннар дег,
Үскүлежир чыгыы турлар.
Ону кылыр, мону кылыр,
Ойзуп келир догааштырыг.
Уйгум келбээн үе-шаамда
Угаанымдан ыравас-тыр.
Бодамчалыг дириг чорда,
Бодалдарым кайын үстүр.
* * *
Дүне, хүндүс бодалдарым
Дүвүредип, дыш-даа бербес.
Дооразындан соксаттынмес,
Долгандырган бөмбүрзек-ле.
Кыйып эртер белдир черде
Кызаңайнып, чивеңейндир.
Үвүреңнээн чычааннар дег,
Үскүлежир чыгыы турлар.
Ону кылыр, мону кылыр,
Ойзуп келир догааштырыг.
Уйгум келбээн үе-шаамда
Угаанымдан ыравас-тыр.
Бодамчалыг дириг чорда,
Бодалдарым кайын үстүр.
"Шын" №56, 2023 чылдың июль 29