Тыва Республиканың Дээди Хуралының (парламентизиниң) дөрткү чыыжының депутаттарының 2024 чылдың сентябрь 8-те эрткен соңгулдаларының түңнелдерин үндүрген.
ТР-ниң Соңгулда комиссиязының даргазы Лариса Андалаеваның сентябрь 12-де дыңнатканы-биле алырга, Тыва Республиканың Дээди Хуралының (парламентизиниң) дөрткү чыыжының депутаттарының соңгулдаларынга 19 девискээр болгаш 187 участок, ол ышкаш республиканың девискээринден дашкаар 2 участок комиссиязы ажылдаан.
Соңгулдаларга 121 190 соңгукчу киришкенин, ол дээрге шупту соңгукчуларның 59,6 хуузу дээрзин ТР-ниң Соңгулда комиссиязының даргазы айыткан.
Соңгукчуларның бадылаашкыннарының түңнелдери мындыг болган:
“Чаңгыс демниг Россия” партия дээш соңгукчуларның 80,01 хуузу бадылаан;
Россия Федерациязының Коммунистиг партиязы – 5,47 хуу;
Россияның Либерал-демократтыг партиязы – 5, 04 хуу;
“Чаа кижилер” партия – 5,41 хуу;
“Чөптүг Россия – шын дээш» партия – 3,29 хуу.
Соңгулдаларның түңнелдерин хүлээп көрген дээрзин Лариса Андалаева дыңнаткан. Ол түңнелдер ёзугаар Тыва Республиканың Дээди Хуралының (парламентизиниң) дөрткү чыыжынга 32 депутат соңгуттурган, республиканың чаңгыс аай соңгулда округундан 16, чаңгыс мандаттыг соңгулда округундан 16 депутат соңгуттурган.
Л. ЛОПСАН белеткээн.
Буян Ооржактың тырттырган чуруу.
“Шын” №70 2024 чылдың сентябрь 14