Республиканың Спорт яамызы 2025 чылда ажыл-чорудулгазын түңнээн. Эрткен чыл регионнуң спортчу адырында эң-не үре-түңнелдиг чылдарның бирээзи болган: тыва спортчулар бүгү-российжи болгаш делегей чергелиг маргылдааларга аңгы-аңгы үнениң 639 медалын чаалап алганнар. Ооң иштинде 222 алдын, 147 мөңгүн, 270 хүлер медальдар, эрткен чылга деңнээрге, 135 медаль хөй.
Республиканың чыынды командалары 213 албан ёзузунуң маргылдааларынга киришкен. Чыл төнчүзүнде 10 спортчу – Россияның чемпионнары, 23 кижи чурттуң бирги чериниң тиилекчилери, 134 кижи чурттуң чыынды командаларының составынче кирген. «Россияның спорт мастери» нормативти 26 спортчу күүсеткен. Бо хүнде спортчу курлавыр белеткелиниң системазында 26 спортчу хевирде 424 тренер ажылдап турар, олар 12,8 муң ажыг спортчуларны белеткеп турар.
Федералдыг төлевилелди боттандырып, «Бизнес-спринт («Спортту шилип алыр мен») федералдыг төлевилел база «Спорт – амыдыралдың нормазы» болгаш «Көдээ суурларда спорт» деп регионалдыг төлевилелдер шугуму-биле улуг ажылдар кылдынган. 2025 чылда Барыын-Хемчик кожууннуң Кызыл-Мажалык база Тес-Хем кожууннуң Берт-Даг суурларында ГТО дужаарынга (Күш-ажылга болгаш камгалалга белен) белеткенир 2 тускай шөлдерни дужааган. Шагаан-Арыгда спортчу комплекс инфраструктуразының тудуу доозулган болгаш ол колдуунда белен (95 хуу).
Оон аңгыда объектилер спортчу-технологтуг дериг-херекселдер-биле бүрүн хандыртынган: Кызыл хоорайда «угаанныг» спорт шөлдеринде комплектилерни салган, 23 спортчу школаларның материал-техниктиг баазазын чаарткан, 1100 ажыг дериг-херекселдерни саткан. Кызыл хоорайда күш-культура-спорт залының болгаш «Спутник» микрорайонунда модульдуг эштир бассейнниң, ол ышкаш көдээ суурларда модульдуг спортчу залдар тудуу уламчылап турар.
Бо хүнде регионда 571 спортчу объект ажылдап турар. Хамаатыларны спортчу объектилер-биле хандырганы 83,1 хуу четкен, күш-культура болгаш спорт-биле доктаамал ойнап турар чоннуң үлүү 60,5 хуу чеде берген.
Адаптивтиг спорттуң хөгжүлдезинче онза кичээнгейни угландырган. Кадыкшыл байдалы кызыгаарлыг 3 муң ажыг кижи күш-культура-биле доктаамал белеткенип турар, бо бөлүктүң спортчулары бүгү-российжи маргылдааларынга 33 медальды чаалап алганнар.
2026 чылда массалыг болгаш профессионал спортту хөгжүдер талазы-биле ажыл уламчылаар. Күш-культура-биле доктаамал белеткелде чурттакчыларның санын көвүдедири, спортчу чаңчылдарны быжыглаары, бүгү-российжи аренага Тываның тергиидекчи туружун кадагалап арттырары – кол сорулга.
Республиканың биче суурларынче тренерлерни болгаш башкыларны хаара тударынче угланган «Көдээ черниң тренери» федералдыг программаны ажылдадыры база бир чугула болуушкун болур.
ТР-ниң Чазааның парлалга албанының медээзи.
“Шын” №9 2026 чылдың март 12