Тыва үндезин культура төвүнге “Чиңзе” аттыг ниитилелдиң удуртукчузу, Россияның Географтыг ниитилелиниң кежигүнү, “Тываның бир дугаар дээди категориялыг гиди” деп шынзылганың эдилекчизи Артцалам Николаевич Хертектиң ажыл-чорудулгазынга тураскааткан фотоделгелгези ажыттынган. Байырлыг ажыдыышкынга Артцалам Николаевичиниң чоок кижилери дөргүл-төрели, эш-өөрү, кады ажылдап чоруур коллегалары чылыг-чымчак байыр сөстерин чедиргеннер.
Артцалам Николаевич төрээн Тывавыстың каас-чараш чурумалдыг черлерин болгаш онзагай булуңнарын чурукка тырттырып, ону чон аразынга мөңгежидип, республика иштинге туризм адырын хөгжүдер талазы-биле хемчеглерни идепкейлиг боттандырып, Тываның туризм адырының сайзыралынга улуг үлүг – хууну киирип чоруур кижилерниң бирээзи.
Тыва улустуң ёзу-чаңчылдарының, аас чогаал болгаш ус-шеверлер төвүнүң мурнундан Артцалам Николаевичиниң чогаадыкчы ажыл-ижиниң бадыткалы – хууда фотоделгелгезиниң ажыдыышкыны-биле изиг байырны чедирип, ам-даа улуг чедиишкиннерни күзеп, хей-аъды бедик, сүлде-сүзүү, тура-соруу быжыг болурун йөрээдивис!
Ук фотоделгелге Тыва төпке ам-даа уламчылаар, күзелдиг кижилерни сонуургап көрүп болур.
Тыва культура төвүнүң медээзи-биле
37