Тыва тон даарар марафон

Шагаан-Арыгның культура төвүнге «Эва» дизайн-студиязының удуртукчузу, социал сайгарлыкчы, немелде өөредилге төвүнүң башкызы Эвелина Байсклан тыва тон даараарынга мастер-классты эрттирген.

Ийи хүн үргүлчүлээр марафонга «узун шөлээде» аваларга, тускай шериг операциязында киржип турар дайынчыларның өг-бүлелериниң кыс ээлеринге, дааранып өөренип алыр күзелдиг херээжен чон боттарынга, ажы-төлүнге тыва тонну быжып, даарап өөренген.

Марафонга ниитизи-биле 20 ава киришкен. Оларның аразында черле ындындан сонуургалдыг, боттарынга, өг-бүлезинге-даа хепти борастап даараптар, тыва тон даарап өөренип алыр изиг күзелдиг авалар база бар.

Чүзүн баазын өңнүг торгулар-биле кымны-даа мурнай тоннарны даарап доозупканнарга тускай шаңналдарны тывыскан. Бирги, ийиги черлерни Арыскандан Ольга Мунзук биле Алена Самбуу, үшкү черни Эйлиг-Хемден «узун шөлээде» ава Дозураш Дакыр-оол алганнар. Уруунга болгаш ийи оглунга тоннарны даарап берген кызымак ава Алия Тюлюшке база тускай шаңналды тывыскан.

Ус-шеверлерниң башкызының Шагаан-Арыгда вторник санында ажыл шагының соонда өөредип турар бөлүү база бар. Эвелина Байсклан өөредилге курстарның ачызында херээжен кижи хепти чүгле быжып, даараарындан аңгыда, кедер хевиниң бодунга тааржыр тускай аян-шинчизин тып билир болурунга өөредип турар. Ол дааранып өөренип алыр күзелдиглер-биле арга-дуржулгажын үлежип, дамчыдып чоруур буянныг аваларның бирээзи.

Бии-Хем кожуунга февраль 3-4 хүннеринде тыва тон даарар мастер-классты ус-шеверлерниң башкызы эрттирер. Ук марафонну социал сайгарлыкчы ТР-ниң Дээди Хуралы, «Россияның авалары» бүгү-российжи хөй-ниити шимчээшкининиң регионалдыг салбыры, «Россияның чөленгиижи» хөй-ниити организацияның регионалдыг салбыры-биле кады организастап эрттирип турар.

Хөй ажы-төлдүг өг-бүлелерге, «узун шөлээде» аваларга, тускай шериг операциязында киржип турар дайынчыларның өг-бүлелериниң кыс ээлеринге мастер-класска киржилге халас. Арткан киржикчилерге ийи хүн үргүлчүлээр дааранылга марафонунуң өртээ – 600 рубль. Тыва тон даарап өөренип алыр күзелдиг херээжен чон торгу, хорагай, тоннуң иштии тодарын, национал өөктерни садып алыр.

Шагаа байырлалының бүдүүзүнде боттарыңарга болгаш өг-бүлеңерге тыва тонну даарап четтигиңер.