«Тыва Республикада чурттакчы чонну ажылга хаара тударын деткиири» программаның күүселдези-биле хамаатыларның күш-ажыл рыногунуң амгы үеде онза херек мергежилдерин бедидеринче угланган элээн каш хемчеглерни боттандырып турар.
Төлевилелдиң кол угланыышкыннарының бирээзи – херек мергежилдерге халас профессионал өөредилгени болгаш мергежил бедидер программаны боттандырары болур. Бо эгелээшкиннер ажылга тургустунарынга бергедежип турар хамаатыларга күш-ажыл рыногунда оларның чижилгелиин бедидер дээш, херек мергежилдерни шиңгээдип алырынга катап өөредилгени чорудар.
Тыва Республикада «Россияда ажыл» кадрлар төвү 2025 чылда 14 өөредилге чери-биле 27 керээни чарган. Кады ажылдажылга езугаар 300 хамааты, ооң иштинде тускай шериг операциязының 27 киржикчизи янзы-бүрү чугула мергежилдерге өөредилгелерни эрткен. Оларның аразында аңгы-аңгы техника аймааның башкарыкчылары, электри болгаш газ-биле дуңзаалакчылар, D биле C категорияның чолаачылары, ол ышкаш кранныг машиналар мунукчулары база дагжылар бар. Ол ышкаш хамаатылар повар, кондитер, массажист, камгалакчы, парикмахер, маникюр мастери, сайгарлыкчы-фермер дээн ышкаш чугула угланыышкыннарга өөредилгени эрткен.
2026 чылдың планнарындан алырга, арматурщик, чүък чүдүрер техника машинизи, СЗМ оператор чолаачызы дээш оон-даа өске угланыышкыннарга өөредилгени организастаар. Киирген чагыглар болгаш ажыл берикчилери-биле идепкейлиг ажылдаанының ачызында бо чүүл боттаныр.
2026 чылда чурттакчы чонну ажылга хаара тударын деткиир улуг хемчегни эгелээр. «Тыва Республикада чурттакчы чонну ажылга хаара тударын деткиири» программа-биле республика бюджединден 6,1 сая рубльди аңгылаан. Чурттакчы чонну ажылга хаара тудар төптерден дуза дилээн 300 ажыг хамаатыларның профессионал белеткелин болгаш немелде өөредилгезин организастаарынче ол акша-хөреңгини угландырар.
Программада кол чаа чүүл — ажыл берикчилериниң чагыынга даянгаш, өөредилге курстарын ажылдадыр. Ол чүүл күш-ажыл рыногунда эң-не херек мергежилдерже кичээнгейни угландырып, программаның доозукчуларын ажылга хаара тударын чедиишкинниг боттандырар арганы бээр.