Республика девискээринде амгы үеде 700 ажыг чаа социал объектилер туттунуп турар. Ол дээрге уруглар садтары, школалар, кадык камгалал, культура, спорт адырларынга хамаарышкан тудуглар болгаш “Эргижирээн оран-савадан чонну көжүрер” программа ёзугаар хөй аал чурттаар чаагайжыды туттунган бажыңнар.
Ниитизи-биле Тывада 15 социал угланыышкынныг төлевилелдерни боттандырары-биле, күжениишкинниг ажыл уламчылап турар. Ылаңгыя мурнуку чылдарга деңнээрге, сөөлгү үеде Кызыл хоорайның чүк-чүгүнде, чаъс соонда мөөгүлер дег, хөй аал чурттаар бажыңнарның улай-улай туттунуп турарын хоорайның чурттакчылары эскерип турар.
Тываның Тудуг яамызында килдис эргелекчизи Буян-Даш Ооржак бо талазы-биле кыска тайылбырны берген:
"Улуг хемчээлдиг инвестициялыг төлевилелдер иштинде комплекстиг микрорайоннар тудуглары кирип турар. Ол дээрге чон аразында “Шанхай” деп адай берген микрорайоннуң орнунга “Мөңгүн” деп чаа микрорайоннуң тудуу база “Спутник” , “Полигон” микрорайоннар-дыр. Ниитизи-биле 85 хөй аал чурттаар бажыңнарның тудуу эгелей берген. Ол тудуглар доостурга, ынаар “Эргижирээн оран-савадан чонну көжүрер” программа ёзугаар чонну чурттадып киирер, а бир чартыы өскүс уругларның оран-савазы болур, артканы садып-саарар квартиралар кылдыр санаттынар.
Амгы үеде Иркутская кудумчузунда барык дооступ турар тудугларга тос каът чаагайжыды туттунган хөй аал чурттаар ийи бажың хамааржыр. Бир бажыңда-ла 80 квартира бар. Ынаар “Эргижирээн оран-савадан чонну көжүрер” болгаш “Өскүс уругларга оран-сава хандырылгазы” программалар ёзугаар чурттакчыларны бо чайын кииреринге белеткеп турар".
“Олчей” КХН-ниң директорунуң оралакчызы Долаана Кысыгбайның чугаазы-биле алырга, чаа туттунган тос каът ийи бажыңче чурттакчыларны кииреринге белен. Туттунган оран-саваның шынарын тускай комиссия хынааш, бажыңнар ажыглалче кииреринге бүгү негелделерге дүгжүп турар деп түңнелди кылган. Ам ажыглалче киирер дугайында актыны тургузары арткан. Ону алган соонда, Тываның Тудуг яамызынга чаа бажыңнарны хүлээдир. Ол бүгү ажыл доостурга, чаа квартираларже аас-кежиктиг ээлери чурттап кириптер.
Ооң-биле ажыл дооступ калбас. Чаа туттунган хөй аал чурттаар бажыңнарның девискээрин чаагайжыдар ажыл уламчылаар. Эрткен чылдарда чаа туттунган бажыңнарның девискээрин чаагайжыдарынче улуг кичээнгей салдынмайн турганы чажыт эвес. Шак мындыг улуг микрорайоннарны хары угда тудар төлевилелдерде чаагайжыдылга айтырыының чугула черни ээлеп турары эки.
А “Өөредилге” национал төлевилел ёзугаар республика девискээринде 5 школа тудуу уламчылап турар. Оларның бирээзи – Кызыл хоорайның Бай-Хаак кудумчузунда 825 олуттуг школа. Бо тудуглар-биле чергелештир 5 уруглар садының тудуу база эгелей берген. План ёзугаар уруглар садтарының тудуун бо чылдың төнчүзүнге чедир доозары көрдүнген, а школаларны 2023–24 чылдарда ажыглалче киирер ужурлуг.
/ К. МОНГУШ.
\В. Шайфулинниң тырттырган чуруу.