Чоннуң чаңгыс деминиң хүнү – 200 ажыг нацияның төлээлери эгин кожа болгаш акы-дуңмалышкы чурттап чоруур Россияның хөй националдыг чоннарының чаңгыс деминиң болгаш эп-найыралының күчү-күжүн илередип турар байырлал. Республика планы ёзугаар Тывага Чоннуң чаңгыс деминиң хүнүнге тураскааткан хемчеглер байырлал бүдүүзүнде-ле эгелээн. Ноябрь 4-те, байырлал хүнүнде, найысылалдың Арат шөлүнге байырлыг концерт, национал өрегелер мөөрейи, тус черниң ус-шеверлериниң ярмарка-садыглаашкыны дээн ышкаш улуг хемчеглер болур.
Республиканың өөредилге черлери, библиотекалар, культура төптери чырыдыышкын хемчеглерин, ооң иштинде Россияның төөгүзүнге хамаарышкан темалыг класс шактарын, викториналар болгаш квестерни, ол ышкаш чурттуң хөй талалыг этнокультуразынга тураскааткан лекциялар болгаш делгелгелерни планнаан.
Октябрь 1-ден эгелээш ноябрь 15-ке чедир уламчылаар уругларның «Мен — Россияның төлү мен» деп бүгү-российжи культура чырыдыышкынныг акция — чырыдыышкын программазының кол болуушкуну болур. Бо акция-биле өөредилге черлери «Чугула чүүлдер дугайында чугаа» информастыг класс шактарын (ноябрь 3), «Авангард» өөредилге-методиктиг төпке «Алдар. Хүлээлге. Шынчы чорук» (ноябрь 4) база «Россия – бис-тир бис» (ноябрь 5) деп патриотчу хемчеглерни эрттирер.
Профессионал өөредилге черлериниң сургуулдарынга «Чоннарның найыралы» спортчу квест оюнун (ноябрь 1-5), «Күчүлүг Россия – ооң күжү чаңгыс деминде» (ноябрь 1-5) концерт программаларын, «Төөгүнүң дугую» (ноябрь 1-7) интеллектуалдыг оюнну организастаар. Оон аңгыда профилактиктиг хемчеглерни, ол ышкаш учетта сургуулдарны (ноябрь 1-5 хүннеринде) хайгаарап чедер.
«Чаштар навигаторлары» регионалдыг курлавыр төвү школачыларга «Россияга аян-чорук» (ноябрь 1-7) стол оюнун база «Төөгүнүң дугую» (ноябрь 1-7) угаан оюнун школачыларга эрттирер.
Октябрь 31-ден ноябрь 12-ге чедир республиканың Аныяктар херектериниң талазы-биле яамының Тыва Республиканың Баштайгыларның шимчээшкини регионалдыг салбыр-биле кады организастааны «Найырал» национал культуралар фестивалы база республиканың Националдар херектериниң талазы-биле агентилелдиң деткимчези-биле кады ноябрь 25-те планнааны Улусчу чогаадылга бажыңынга эртер «Россияның байлаа-2025» республиканың Национал культуралар фестивалы – эң улуг хемчеглер.
«Баскетболду – школаже» бүгү-россия чергелиг маргылдааның (октябрь 20-ден ноябрь 10-га чедир) база «Хөм бөмбүк – школаның футбол лигазы» мини-футбол маргылдаазының (октябрь 27-ден ноябрь 20-ге чедир) школачы чадалары байырлалдың спортчу программазында кирген, аңаа бүгү республиканың ниити өөредилге организацияларының командалары киржир.
Тываның Күш-ажыл болгаш социал политика яамызы бажың-интернаттар чурттакчыларынга элээн каш хемчеглерни организастап эрттирер. Ноябрь 4-те социал албан черлеринге «Чоннар хөй – чурт чаңгыс!» видео-роликтерлиг ужуражылга, «Чаңгыс дээр адаанда» флешмоб, «Россияның күжү — чоннуң чаңгыс деминде» викторина, «Чаңгыс демниг бис — тиилеттирбес бис!» байырлал концерти планда кирген. Ноябрь 1-ден 4-ке чедир бажың-интернаттар чурттакчыларынга «Кады бис» деп чуруктар делгелгезин база организастаар.
Байырлал Кызылдың Арат шөлүнге ноябрь 4-те 12.00 шакта эгелээр. Бо удаада программада бир онзагай болуушкун — «Борщ фестивалы» чарлаттынган. Организакчылар — Тываның Националдар херектериниң талазы-биле агентилелдиң дыңнатканы-биле алырга, Орус культура төвүнүң ажылдакчылары орус борщту белеткеп, байырлалдың киржикчилерин хүндүлээр.
12+