«Өг-бүле» национал төлевилелдиң «Улуг салгал» федералдыг төлевилели-биле Тыва Республикада Каа-Хем кожууннуң Дерзиг-Аксы суурда социал ужур-уткалыг объект — улуг назылыг болгаш инвалид улуска бажың-интернаттың тудуу уламчылап турар. Эмчи болгаш амыдырал-хандырылга өрээлдерлиг, 180 оруннуг интернаттың бажыңын чада аайы-биле тудуп турар. Амгы үеде ол 75,2 хуу белен.
Тываның тудуг сайыды Артыш Кыргыс республиканың Күш-ажыл болгаш социал политика яамызындан коллегалары-биле кады тудуг шөлүн хынап, үнүүшкүннү чоруткан. Хыналда үезинде ажылдарның график езугаар чорудуун база шынарын көрген.
«Бастион» КХН тудуг организациязы тудуг-монтаж ажылдарын кылып турар. Керээ езугаар тудуг ажылдарын бүрүнү-биле доозар: оран-савазын тудуп, иштики болгаш даштыкы инженер четкилерин шөйүп, девискээрин чаагайжыдар.
Амгы үеде өртке удур тускай черни, ижер суг шыгжамырларын, суг алыр болгаш арыглаар объектилер тудуу шуут доозулган. Даштыкы инженер четкизи база чылыг оруун кылган, модульдуг котельнаяны эптээн, чылыг хандырылгазын хандырган. Кол болгаш чуртталга бажыңнарында тудуштурулга болгаш эптеп салыр ажылдар доозулган, лифт кабиналарын тургускан, кырын болгаш даштын чылыглап дуглаар ажылдар чоруп турар. Чуртталга корпустарында иштики ажылдар доозулгалак, инженер системаларын болгаш электри четкизин кожар ажылдар чоруп турар. Девискээр чаагайжыдар болгаш демир-бетон херимнер тургузар ажылдар эгелээн.
Объект тудуунда чээрби алды специалистер болгаш тудуг техниказы хаара туттунган. Херек тудуг болгаш шеверлел материалдарын план езугаар хандырган.
Тыва Республиканың Тудуг яамызы тудуг ажылдарын доктаамал хайгааралда алган. Тудужулар-биле неделя санында ажылчын хуралдарны эрттирип, тургустунган айтырыгларны дүрген шиитпирлээр дээш, хыналдалыг үнүүшкүннерни чорудуп турар. 2024 чылда төлевилел документациязы күрүнениң ийиги эксперт хыналдазын эрткеш, чогумчалыг түңнелди алган. Ол чүүл төлевилел планын эде көөр, ажылдың бедик шынарлыг күүселдезин хандырар арганы берген.
Тыва Республиканың Чазаа федералдыг эрге-чагырга органнары-биле төлевилелди боттандырарынга болгаш акшаландырыышкын графигин сагыырынга ниити кады ажылдажылганы хандырып турар. «Орук картазынче» кирген өскерилгелер тудуг-монтаж ажылдарын доозарынга база ийиги чадаже шилчииринге — объектини амгы үениң дериг-херекселдери-биле чепсеглээр арганы бээр.
2026 чылда тудуг-монтаж ажылдарын доозары планнаттынган, хоочуннар бажыңы техниктиг курлавырлар болгаш дериг-херекселдер-биле чепсеглеттинер ужурлуг. План езугаар бажың-интернат бо чылын ажыглалче кирер.