Эрткен неделяда регион Баштыңының дорт дамчыдылгазының үезинде чоннуң көдүрген чидиг айтырыгларының бирээзи — Кызылдың чоок-кавы девискээринге чырыктың бо-ла өже бээриниң дугайында болган. Владислав Ховалыг үрелиишкиннерниң чылдагаанын тайылбырлап, республиканың энергетика инфраструктуразының күчү-күжүн бедидер дээш, регионалдыг эрге-чагырганың чорудуп турар ажылдарын тайылбырлаан.
Кызылдың аңгы-аңгы девискээрлеринде — оң база солагай талакы эриктерде дачалар ниитилелдеринден база Вавилин ээтпээнде чурттакчылардан чырыкка хамаарыштыр дыңнадыглар кирген. Кыжын одалга үези эгелээрге, ол шуут көвүдеп каар. Республиканың Баштыңы Владислав Ховалыгның энергия четкизинде чүък улгады бээринден чырык бо-ла өжүп турарын тайылбырлаан. Ылаңгыя дача ниитилелдеринде амгы четкилер чылдар-чылдары-биле чаарттынмаан, ол ышкаш эң эгезинде дачаларны бүдүн чыл дургузунда чурттаар кылдыр эвес, а сезоннуг үеде ажыглаар кылдыр туткан бооп турар. База хоорайда чаа тудуг объектилерин чырык четкизинге кожуп турарындан электрини бо-ла өжүрүп турар.
Тываның Чазаа айыттынган чүүлдерни барымдаалап, энергетика инфраструктуразының хөгжүлдезин дүргедедири-биле план езугаар ажылдарны тургускан. Тодаргайлаарга, бо ажылдың электри четкилерин дамчыдар бирги чадазы доозулган. Электри четки ажыл-агыйын чаартырда, кымның-даа харыысалгазында эвес «ээзи чок» четкилер айтырыын хоойлу езугаар шиитпирлээри чугула. 2024 чылдың декабрьда Кызылдың Вавилин ээтпээнде садчылар ниитилежилгезиниң электри четкилерин «Россети Сибирь Тываэнерго» энергетика компаниязының балансызынче албан ёзузу-биле шилчиткен. Ындыг болзажок дачалар девискээринде чырык энергиязының шынарын бедидер дизе, амгы четкилерниң чүъгүн эвээжедир ужурлуг чаа подстанцияларны ажыглалче киирери негеттинип турар. Бо чылдың төнчүзүнге чедир СНТ-лерде үш чаа трансформатор подстанцияларын ажыглалче киирер ужурлуг.
Хүлээп алганы шупту четкилерниң улуг хемчээлдиг капитал септелгезин болгаш чаартылгазын ийиги чадада чорудар. «Россети Сибирь Тываэнергонуң» инвестиция программазы-биле ол ажылды чорударынга 2026 чылда акша-хөреңгини тускайлаан. Владислав Ховалыг Кызылдың оң талакы эрик девискээринде четкилерниң капитал септелгези база эгелээрин дыңнаткан.
ТР-ниң Чазааның парлалга албаны.