Эрткен неделяның беш хонуунда, январь 22-ден 26-га чедир, ОРВИ база грипптен аарыыр чорук 15,5 хуу эвээжээнин Тыва Республиканың Росхереглелхайгааралының ТР-де эргелели дыңнаткан.
Илереттинген 1048 таварылгада 14 харга чедир уруглардан 687 кижи аарааны демдеглеттинген. 77 аарыг кижини, ооң иштинде 14 харга чедир 58 уругну эмнелгеде чыттырган. Республиканың кол санитар эмчизи Людмила Салчак соок үеде республиканың школаларын ырактан өөредиринче шилчиткенинден аарыг эвээжээн деп санап турар.
А COVID-19-тан аарыыры 60 хуу көвүдээнин ол дыңнаткен. Январьның 22–26 хүннеринде республикада чаа коронавирустан аараан 16 таварылга бүрүткеттинген: 7 улуг кижи, 17 харга чедир 9 уруг.
Стационарлыг эмнээшкинде 5 аарыг кижи бар, оларның байдалы аар. 6 кижи амбулаторлуг эмнээшкинни ап турар. COVID-19-тан аараан кижилерге 50 орунну тускайлаан, ол орун фондузу амдыызында четчир.
Халдавырлыг тыныш аарыгларындан аарыыр чорукту эвээжедири-биле, холдарны чуп, арыг-силигни сагыырын санитар эмчилер чагып турар. Оон аңгыда, хөй кижилер чыылган черлерге масканы кедер, эртенги “шүүрээшкинни” чорудуп, аштап-арыглаашкынны кылыр.
Аарыг кижилерни, ылаңгыя бичии уругларны коллективтерже киирерин болдурбас.
Тываның Чазааның парлалга албаны.
Чурукту интернеттен алган
«Шын» №7 2024 чылдың январь 31