Тускай шериг операциязының эгезинден тура Тываның чурттакчы чону Донбассче 43 ажыг тонна гуманитарлыг болгаш өске-даа деткимчени чыггаш, чоруткан.
Ооң кезек чамдыызын Луганск болгаш Донецк Улус Республикаларны украин нацистерден камгалап турар солдаттарга болгаш офицерлерге чоруткан. Арткан аъш-чем болгаш идик-хептен тургустунган чүъктү хостаан девискээрлерниң чурттакчы чонунга чыгган. Гуманитарлыг деткимчеге күрүнениң албан черлери, күүсекчи эрге-чагырга органнары, хөй-ниити организациялары, хуу кижилер болгаш хуу сайгарлыкчылар киришкен.
Республиканың яамыларының болгаш ведомстволарының ажылчын коллективтери база кыдыынга артпаан. Тываның Күш-ажыл болгаш социал политика, Спорт, Көдээ ажыл-агый болгаш аъш-чем яамыларының ажылдакчылары идепкейин көргүскен. Тываның медицина каттыжылгазы 3 миллион ажыг рубльди чыып берген, ооң ийи ажыг миллиону Республиканың 1 дугаар эмнелгезиниң ажылдакчыларынга хамааржыр.
Республиканың кожууннарынга база гуманитарлыг чыылданы кылган. Аңаа Бай-Тайга, Кызыл, Улуг-Хем, Чөөн-Хемчик болгаш Мөңгүн-Тайга кожууннар болгаш Кызыл хоорай эң-не идепкейлиг киржилгезин көргүскен.
Деткимче аразында аъш-чем, идик-хеп, эмнер болгаш бирги хереглелдиң барааннары, ол ышкаш шериглерге оларны бажыңнарында манап турар чоок кижилерин сагындырган моральдыг деткимчени көргүскен посылкалар бар.
Республиканың төвүнде тускай операция киржикчилеринге болгаш Донбасстың чурттакчыларынга деткимче чыыр пункт Кочетов кудумчузунда 155 дугаарлыг бажыңда турар. Шак-ла ындыг пунктуларны кожууннарның Өг-бүлелерге болгаш уругларга социал деткимче көргүзер төптеринде бар.
Чыылда пунктуларынче буянныг кижилер эргежок чугула барааннарны болгаш аъш-чемни хүннүң-не чедирип турар, ынчангаш Тывада гуманитарлыг деткимче чыылдазы уламчылап турар.