Бо чылдың июнь 11-де, Россияның ИХЯ-зының полициязының 6 дугаар эргелелиниң ОШАЧКИ-ниң ажылдакчылары 47 дугаар километрге “Кызыл — Сарыг-Сеп” автоорукка 35 харлыг Сарыг-Сеп суурнуң чурттакчызының башкарып чорааны «Nissan Patrol 5.6» марканың автомашиназын доктааткан. Хыналда үезинде автомашинаның чуък шыгжаар черинден янзы-бүрү хемчээлдиг болгаш аттарлыг 120 шил пивону тыпкан.
Чолаачы арага сөөртүрүнүң кандыг-даа документилерин полиция ажылдакчыларынга көргүзүп шыдаваан. Оон аңгыда полиция ол арага аймаан Чаңгыс аай күрүнениң автоматчыткан информация системазынга (ЧАИС) бүрүткеттинмээнинден, хоойлуга удур чүүл деп тодараткан. Ол дээрге 22.11.1995 чылдың «Этилдиг спирттиң, арага болгаш спирт холумактыг барааннын бүдүрүлгезиниң болгаш эргилдезиниң (садып-саарарының) күрүне чурумчудулгазы болгаш оларны ажыглаарын (ижерин) кызыгаарлаар дугайында» федералдыг хоойлузунуң № 171-ФЗ-ниң негелделерин хажытканы болур.
Чолаачы айыттынган спирттиг суксуннарны Кызыл хоорайның бир баазазындан садып алгаш, улаштыр садар дээш, Сарыг-Сеп суурда өөнүң ээзиниң садыынче сөөртүп бар чыдарын тайылбырлаан.
Шагдаалар 156,6 литр пивону хавырган.
“Ак-Довурак — Абаза” автооруктуң 48 дугаар километринге эзиртир суксун сөөртүрүнүң база бир таварылгазын полиция ажылдакчылары илередип тыпкан. Тыва Республиканың ИХЯ-зының ОШАЧКИ-ниң аңгы ротазының ажылдакчылары Ак-Довурактың 25 харлыг чурттакчызының мунуп чорааны «Мitsubishi Fuco Super Great» автомашиназын доктааткан. Машинаның багаж салбырын хынап тура, шагдаа ажылдакчылары 0,5 литр хемчээлдиг 8 хааржак пиво продукциязын тыпкаш, хавырган.
Машина чолаачызының база-ла арага-дары сөөртүр кандыг-даа документ чогу илерээн. Ол пиво продукциязын куда эрттиреринге ажыглаар дээш, Абакандан садып алганын тайылбырлаан.
Полиция ажылдакчылары 80 литр ниити хемчээлдиг пиво продукциязын хавырып алган.
РФ-тиң Административтиг кем-херек үүлгедиишкиннериниң дугайында кодекстиң «Арага суксуннарын хууда кижилерниң хоойлуга удур шимчедири» деп 14.17.2 чүүлүнге дүүштүр административтиг кем-херек үүлгедиишкининиң демдектери деп көстүп турар, ында административтиг кем-херек үүлгедиишкининиң демдээ бооп турар продукцияны хавыргаш, хамаатыларга 25 муң рубль чедир түңнүг административтиг торгаалды бээр.
Арага суксуннарының хоойлуга удур эргилдезин болдурбазынче угланган хемчеглерни доктаамал чорудуп, ам-даа уламчылап турар.
Тыва Республиканың ИХЯ-ның парлалга албаны.