Тывада национал диаспораларның төлээлери мобилизацияга киржиринге белен

Амгы үеде Украинада чоруп турар тускай шериг операциязында киржип турар дайынчыларга Тывада бар национал диаспораларның төлээлери дуза кадарынга беленин илереткен. Узбек, кыргыз диаспораларның төлээлери республикада хөй чыл чурттап турар болгаш тыва черивиске хумагалыг, чонувустуң аажы-чаңын, ёзу-чаңчылдарывысты хүндүлеп билир болгаш моон чоруп турар оолдар-биле кады чоруурундан ойталавайн, херек дузаны чедирип турар. Олар эрткен хүннерде идик-хеп болгаш өске-даа дайынчы кижиге чугула херек чүүлдерни чыып белеткээн.

Республиканың Шериг комиссариадынга олар четкеш, мобилизация-биле чоруп турар оолдар даңзызында ат-сывы кирген бе дээрзин тодарадып ап турганнар. Даңзыда ады киргеннер, дарый чоруурунга беленин көргүскен.

Калыбек Борончиев. Кыргыз диаспораның төлээзи:

- Бистиң диаспоравыс мобилизация дугайында дыңнааш, девидеп, дезип халышпаан-даа. Кижи бүрүзү кылган ажылын уламчылавышаан. Украинага тускай шериг операциязы эгелей бээрге-ле, бистиң диаспорадан үш оол ынаар чоруткаш, ам-даа шериг албан-хүлээлгезин күүседип турлар. Россия Федерациязының хамаатызы болганда, чаңгыс чер-чурттугларывыс-биле деңге бүгү чүүлге демин кадып, киржир апаар. Тиилелге Россияның болур дээрзинге черле чигзинмес мен.

Сухроб Худайбердиев. Узбек диаспораның төлээзи:

- Бо хүнде бистиң диаспорадан мобилизация-биле чоруткан кижи амдыызында чок. Ындыг-даа болза, акы-дуңмалышкы эгин кожа чурттап чоруур чонувусту деткииринге кезээде белен бис. Хөй чылдар дургузунда мында чурттап чоруур болгаш тыва ёзу-чаңчылдарны, республиканың чонунуң аажы-чаңын эки билир бис. Ылаңгыя аныяктар бот-боттары таныжар, эдержип чоруур. Бистиң аныяктарывыс-биле ужуражырывыска, Россияны камгалап, фашизмге удур демисежиринге беленин чугаалап турдулар.

Оон аңгыда армян, таджик, кыргыс, узбек, азербайджан диаспораларның төлээлери тускай шериг операциязында киржип турар оолдарга дуза кадары-биле идик-хеп, эмнер дээш өске-даа чүүлдерни чыыр пунктуну ажыткан.

Анна Терджанян. Армян диаспораның төлээзи:

- Армян чон дайын деп чүл дээрзин, кижилерниң салым-чолунга дайынның кайы хире хилинчек чедирерин херек кырында көрген, кончуг эки билир. Бо кадыг-берге үеде ында турар оолдарның артында улуг деткимче бар, чону олар-биле кады деп билип алыры дыка чугула. Мээң бодумнуң чоок төрелдеримниң хөй кезии тускай шериг операциязында киржип турар, бистиң диаспораның аныяк оолдары эки турачылап мобилизация-биле чоруур деп турлар. Ынчангаш шупту демниг болур болзувусса, черле тиилеп алыр бис.

Бурул Турумбекова.Кыргыз диаспораның төлээзи.

-Бистиң диаспорадан дөрт оол тускай шериг операциязында киржип турлар. Бо хүннерде бирээзи шөлээлеп чедип келген. Ам бир ай болгаш катап ынаар чоруур дээн. Бо удаада эки туразы-биле ынаар баар дээн оолдарывыска орукка хереглээр акша-көпеекти чыггаш, бердивис, идик-хеп болгаш өске-даа чүүлдерни турскай шериг операциязында киржип турар оолдарга дуза болзун дээш чыып, чорударынга белеткеп тур бис. Бис Россияның чону-биле кезээде кады бис! Россияга бүзүрээр бис! Тиилелге бистии болур!

Ниитизи-биле республикавыстың хөй омак-сөөктүг чону чаңгыс күштүг чудурук дег демин көргүзүп, Россияның кырында диргелип келген кара булутту чайладырынга шупту беленин көргүзүп турар.

К. Монгуш.
И.Клоян.