Тываның федералдыг болгаш регионалдыг оруктарынга айыыл чок болгаш шаптараазын чок шимчээшкин чоруп турзун дээш чагган харны дүн-хүн чокка аштап-арыглап турар.
Ноябрь 8-тиң байдалы-биле, 16 хүлээникчи организацияның 15-и, 56 техника, 60 ажыг орук ажылдакчылары федералдыг болгаш регионалдыг оруктарны аштаары-биле хаара туттунган. Тускай техника оруктарда болгаш оларның кыдыгларында харны аштап, тайгыр болбазын дээш довуракты төп турар.
Тываның орук-транспорт яамызының дыңнатканы-биле оруктарда бергедээшкиннер чок. Эрткен каш хонуктарда регионалдыг оруктарда орук озал-ондаа бүрүткеттинмээн.
Агаар-бойдустуң сооп келири, оруктарның тайгыр апаары, оруктарда харны аштаарының чугулазы - амгы үеде орук албаннарының ажылдаар ужурлуг чаңчылчаан байдалдары-дыр. Специалистер оруктарда байдалдарны кичээнгейлиг хайгаарап, аргыжылганы айыыл чок болдурары-биле дүрген дуза чедирер албан черлери-биле кады ажылдап турар.
Агаар-бойдустуң байдалын көрүп тургаш, аргалыг болза узун орук чорбазын Тываның Орук-транспорт яамызы болгаш республиканың орук албан черлери чолаачыларны кыйгырып турар. Аргажок ырак чер чоруур апарза, хенертен машинаны тургузарын, баарында машинаны оюп эртерин, болдурбас, автомобильдиң дүргенин улгаттырбайн, чогуур деңнелге тудуп, арты-мурнунда машиналар-биле аразында айыыл чок хемчээлди сагып чорууру чугула.
Дүрген дуза херек байдалдарда оруктарда ажылдап турар орук албанының дежурныйы-биле азы "Тываавтодор" күрүне албан чери-биле дараазында телефон дугаарларын дамчыштыр харылзажып болур:
8(39422) 3-22-62, 8-929-358-09-11, на трассе Р-257 по тел. 8-923-355-09-73 (дүн-хүн чокка ажылдап турар).
Дүрген дуза чедирер албанның телефон дугаары - 112
Чуруктарны Орук-транспорт яамызындан алган.