Тываның Өөредилге яамызының болгаш Бүгү-россияның уруглар болгаш аныяктарның «Баштайгыларниң шимчээшкини» хөй-ниити-күрүне шимчээшкининиң регионалдыг салбырының деткимчези-биле Биосферлиг шинчилелдер төвүнүң баазазында «Геосфера» деп школачыларның эртем клуву ажыттынган. Россияның Президентизиниң чарлааны Россия Федерациязында Эртем болгаш техниканың он чыл планын база Тыва Республиканың Баштыңы Владислав Ховалыгның эгелээни «Эртем – уругларга» губернатор төлевилелин боттандырары-биле база «Аныяктар болгаш чаштар» национал төлевилелдиң «Кады бис» федералдыг төлевилел ёзугаар уругларның эртем каттыжыышкыны тургустунган.
«Геосфера» клуву школачыларга болгаш студентилерге долгандыр хүрээлел-биле солун кичээлдер, шинчилелдер болгаш практиктиг ажылдар таварыштыр оларның бойдус эртемнеринге сонуургалын сайзырадыр угланыышкынныг.
Эртем клувунуң кол сорулгалары – келир салгалдарга Тываның онзагай бойдузун сайзырадырының, экологтуг үзел-бодалды болгаш бойдуска камныг хамаарылганы хевирлээриниң дугайында билиглерни калбартыр.
Клубтуң ажыдыышкынынче Кызылдың №16 лицейиниң өөреникчилерин чалаан.
Өөредилге яамызының эртем килдизиниң начальниги Ольга Монгуш, Россияның «Баштайгыларның шимчээшкининиң» регионалдыг чөвүлелиниң даргазы Эртине Куулар, Биосферлиг шинчилелдер төвүнүң директору, биология эртеминиң кандидады Чечекмаа Назын уругларга чагыг сөстерни берген.
Даштар болгаш минералдарның онзагай экспонаттары, «Микроскоп адаанда делегей» деп мастер-класс уругларның кичээнгейин хаара тудуп, хар кырының шинчилелин канчаар чорударын база көргүскен.
Ай санында эртер клубтуң кичээлдери чедингир болгаш солун хевирге эртер: беседалар, сайгарылгалар, мини-лекциялар, экскурсиялар болгаш Москва, Новосибирск, Барнаул болгаш Россияның өске-даа хоорайларындан чалаан эксперттер-биле мастер-класстар уругларны манап турар.
ТР-ниң Чазааның парлалга албаны.