2023 чылда Россияның Социал фондузунуң Тыва Республикада салбыры 48 059 түр үеде ажыл кылыр шинек чок дугайында электроннуг хевирлиг хуудусту төлеп берген. Бо сорулгага 454,2 сая ажыг рубльди углаан.
Россияга электроннуг хуудустарже долу шилчилгени 2022 чылдан тура кылган. Ону боттандырганының түңнелинде, эмнедикчилерниң, эмчилерниң болгаш ажыл берикчилериниң аразында кады ажылдажылга бөдүүнчээн болгаш дүрген апарган.
«Компаниялар эмнедиишкин хуудустарының дугайында дыңнадыгларны чурагайлыг хевир-биле ап турарлар, ындыг чүүл оларны долдуруп турда, частырыгны эрттирбейн баар арганы бээр. Бодунуң ээлчээнде ажылдакчылар база түр үеде ажыл кылыр шинек чок калганының хуудузунуң төлевирин кандыг-даа шаптараазын чокка алыр апарган. Эмнелге организациязы хуудусту хагганының, а Социал фондуже эргежок чугула медээ-дыңнадыглар келген соонда, 10 хонуктуң дургузунда болур-чогуур пособиени төлеп бээр» – деп, Россияның Социал фондузунуң Тыва Республикада Салбырының эргелекчизи Светлана Кенден тайылбырлап турар.
Электроннуг хуудустарже шилчилге ажылдакчыларга төлеп бериишкиннерниң дугайында медээни доктаамал алыр арганы берген. Күрүнениң ачы-дуза порталында амы-хууда өрээлин таварыштыр эмнедиишкин хуудузун кажан ажытканының, узатканының база хагганының дугайында болгаш өске-даа медээ-дыңнадыгларны эдерти хайгаарап болур.
Оон аңгыда, чурагайлыг хевир шалың дугайында шынзылгадан ойталаар арганы берген. 2023 чылдан тура организациялар ындыг документини бербейн барып, а ажылдакчылар кол ажылдап турар черинге ону көргүспейн барып болурлар. Түңнелинде, эмнелге организацияларындан хуудусту хагганының дугайында, Федералдыг үндүрүг албанындан шалың дугайында сан-медээ келгениниң соонда, фонд ажыл берикчизиниң киржилгези чокка түр үеде ажыл кылыр шинек чогунуң дугайында пособиени санааш, төлеп бээр.
Россияның Социал фондузунуң Тывада салбырының медээлеринден А. ХЕРТЕК белеткээн.
“Шын” №9 2023 чылдың февраль 7