Тываныӊ Чазаанга российжи–моол кады ажылдажылга дугайында ажылчын ужуражылга болур.
Ужуражылгага республиканыӊ Чазааныӊ, Красноярскыныӊ каайлы албаныныӊ даргазы Василий Костомаров, Сибирьниӊ каайлы эргелелиниӊ килдис даргазы Виктория Өлчей Моолда каайлы органнарыныӊ төлээлери киржир. Ийи чурт аразында каайлы чериниӊ кады ажылдажылгазын, Кызылга агаар аргыжылгазыныӊ эрттирилге пунктузун сайзырадырын чугаалажыр.
Кызыл хоорайга май 17–18 хүннеринде Красноярскыныӊ каайлы албаныныӊ, Моолдуӊ каайлы органнарыныӊ төлээлери ужуражылгаларны эрттирер.
Аңаа «Хандагайты», «Боршоо» хөй талалыг эрттирилге пунктуларыныӊ чаартып кылганын, ооӊ эрге-байдалын өскертириниӊ, кызыгаар таварыштыр кады ажылдажылганыӊ, садыг-экономиктиг харылзааларныӊ, кызыгаар чоогунда девискээрлерни сайзырадырыныӊ дугайында чугаалажыр.
Амгы үеде Тыва Республикада российжи–моол кызыгаар таварыштыр автомашиналар эрттирер Цагаан-Тологой, Шара-Сур, Хандагайты деп үш пункт ажылдап турар.
Хандагайтыда эрттирилге пунктузун таварыштыр улуг аргыжылга оруун белеткээри-биле, 2022 чылда ону чаартып кылып эгелээн.
Бо эрттирилге пунктузунуӊ эрге-байдалын өскертиптерге, чүгле Россия биле Моолдуӊ эвес, а даштыкы чурттарныӊ хамаатылары ол эрттирилге пунктузундан аргыжып болур апаар.
Ооӊ-биле чергелештир Кызылдыӊ аэропортунда агаарныӊ эрттирилге пунктузун болур-чогуур дериг-херекселдер-биле чаартып кылыр ажылдар чоруп турар. Аэропортка ол пункт ажылдай бээрге, республиканыӊ найысылалы, Моолдуӊ төвү Улан-Батор хоорай болгаш Кыдат-биле делегей чергелиг авиа аргыжылга эгелей бээр.
/ Р. ДЕМЧИК белеткээн.
"Шын" №35 2023 чылдың май 17