Төпчүткен одалга системаларлыг муниципалиттерден одалга сезонунче бир дугаарында Каа-Хем, Бии-Хем, Барыын-Хемчик база Таңды кожууннар кирер. Бо кожууннарның объектилеринче чылыг сентябрь 15-те чедип кээр. Одалга сезонунуң эгелээриниң дугайында шиитпирни муниципалдыг тургузуг чагыргазы боттары хүлээп алырын сагындыраал.
Кызылдың, Улуг-Хем, Чөөн-Хемчик база Кызыл кожууннарның социал объектилеринче база хөй аалдыг бажыңнарынче чылыгны сентябрь 16-да бээр. Төпчүткен одалга Чеди-Хөл кожуунга сентябрь 18-те, Чаа-Хөлге сентябрь 20-де, Ак-Довурак хоорайга сентябрь 23-те эгелээр.
Республикада кышкы үеге белеткел штаттыг чурум-биле эрткенин, Одалга болгаш энерегетика яамызы дыңнаткан. Одалга сезонунга ниити белеткел 94 хуу. Бо хүннүү-биле алырга, социал адырның объектилери 98 хуу белен. Чуртталга-коммунал ажыл-агыйының бүдүрүлгелери 96 хуу, а одалга-энергетика компекизиниң бүдүрүлгелери 87 хуу белеткенген.
Республикага одалга сезонун эки эрттиреринге 231 525 тонна хөмүр херек. Бөгүнде республиканың социал объектилери хөмүр-биле 49 хуу хандыртынган.
Кыдыкы соңгу чүкке хамаарыштырган республиканың чедери берге чурттакчылыг черелеринче 12 059 тонна хөмүрнү, азы ниити хереглелдиң 73 хуузун сөөртүп чедирген. Республиканың 13 муниципалитединде хөмүр одаар 31 суур аңаа хамаражыр.
Каа-Хемниң болгаш Чадаананың хөмүр-даш уургайлары чурттакчы чонга хөмүрнү «Хөмүр продукциязы» регионалдыг автоматчыткан система https://cpgu.rtyva.ru/ таварыштыр садып турар. Тываның Баштыңы Владислав Ховалыгның даалгазы езугаар, чурттакчы чон ортумак рынок өртээнден чиикке одаар чүүлдү садып алыр кылдыр ол программаны тургускан.
Системага бүрүткедири белен. Ынаар үш аңгы арга-биле коштунуп болур:
Күрүне ачы-дузалар дамчыштыр https://cpgu.rtyva.ru/ ГИС-ке бодун бүрүткедир;
Системага дорт бүрүткедир. Бо удаада Күрүне ачы-дузаларынга бүрүткел херекчок, порталче кире бергеш, бөдүүн анкетаны долдурар;
Үшкү арга — аңгы-аңгы чылдагааннар-биле боттары ону кылып шыдавас хамаатыларга хамааржыр. Тус чер чагырга черлеринче боттары баар. «Хөмүр продукциязы» ГИС-ке бүрүткедир дугайында билдириишкинни бижээш киирерге, ажылдакчылар оларны бүрүткедир.