Тывага православ шажын чүдүкчүлериниң кол байырлалы – Рождествону демгелээн. Кызылдың Воскресенск дуганынга чаңчыл езугаар январь 6 дүнезинден 7-ге чедир мөргүл номчулгазы эрткен.
Кол православ байырлалдарда үргүлчү эрттирер Василий Великий мөргүл номчулгазы болган. Ол мөргүл анаа хүннерде эрттирер Иоанн Златоуст мөргүлүнге бодаарга, шала үр болур деп Кызылдың епархиязы дыңнаткан.
Дуганның иштинге шажынчы ырылар, мөргүлдер база чулалар чырыы байырланчыг шинчи киирген. Чижээлээрге, дуганның хору мөргүл ырызы-биле байырлалды каастаан, ооң-биле чергелештир чүдүкчүлер өреге болгаш өг-бүле бүрүзүнге тайбың дугайында мөргүлдү номчаан.
«Рождество – бистиң православ чүдүлгеде эң-не кол байырлалывыс. Ол хүн Христос төрүттүнген. Ол бистиң камгалакчывыс, кижи төрелгетенни камгалаар дээш кижи болуп бодараан» - деп, чүдүкчүлерниң бирээзи чугаалаан.
Рождество байырлалын библияның тоолчургу чугаазындан үндезилээн: чогум-на ол хүн Иерусалимниң мурнуу чүгүнде Вифлеемге Иисус Христос чырык черге бодараан. Ооң төрүттүнгенин январь 6-да, Сочельник хүнүнде байырлап эгелээр. Тоолчургу чугаа езугаар алырга, ол хүн дээрге волхвы деп адаар мерген угаанныг кижилерни Вифлеемче эдертип келген бирги сылдыс тывылган. Рождествонуң эртенинде, хүндүс чоок кижилер бот-боттарынга белектер тыпсып, эки күзээшкиннер кылып байырлаар.
Буяна Ооржактың тырттырган чуруктары.