Тываның Өөредилге яамызы «Профессионалдар» тускай ортумак мергежилдер болгаш бедик технологиялар чемпионаттарының регионалдыг чадалары эгелээнин дыңнаткан. Мөөрейлер февраль 9-тан 14-ке чедир 12 өөредилге черлеринге болуп эртер. Ооң шөлдеринге тергиин ат дээш 200 ажыг киржикчи, оларның аразында 30 элээдилер болгаш 190 ажыг аныяк профессионалдар 38 профессионал тускай мергежилдерге мөөрейлежир.
Бо чылдың программазында дөрт чаа мергежилдер бир дугаар немешкен. Тээли суурда Тываның улусчу ус-шеверлел колледжизинге болуп эртер «Ыяшка уран-чечен сиилбилге» мөөрейи солун болуру чугаажок. Оон аңгыда «Аныяктар болгаш уруглар» национал төлевилелдиң «Профессионалитет» федералдыг төлевилели езугаар 2025 чылда тургустунган чаа өөредилге-бүдүрүлге төптеринге: Тываның тудуг техникумунга «Дуңзаалаар технологиялар» болгаш «Иштики шеверлел болгаш каасталга ажылдары», а Ак-Довурактың даг техникумунга «Ажыктыг казымалдарны болбаазырадыры» деп мөөрейлерни организастаар.
Киржикчилерниң ажылдарын дагдыныкчылары, кол, тускай база бүдүрүлге специалистери дээш, 400 ажыг эксперттер үнелээр. Мөөрейжилер регионнуң кол адырлары – көдээ ажыл-агый, тудуг, информация технологиязындан эгелээш, медицина, транспорт, ачы-дуза чедирилгези болгаш улусчу ус-шеверлел ажылдарынга билиг-мергежилин көргүзер.
Чемпионаттарның кол сорулгазы – ажылчын мергежилдерниң эрге-байдалын болгаш ужур-утказын бедидери, аныяктарның профессионал өзүлдезинге байдалдарны тургузары деп, организакчылар дыңнаткан. Чемпионаттар чүгле салым-чаяанны ажыдар эвес, а регионнуң экономиказын шыырак кадрлар-биле хандырарынга чугула базым болур.
ТР-ниң Чазааның парлалга албаны.