Тывада тускай шериг операциязының киржикчилерин деткиириниң талазы-биле Күрүне фондузунуң регионалдыг салбырын ажыдарынга белеткел ажылдары чоруп турар. Бо чедиликтиң эгезинде Россияның Президентизи Владимир Путин “Ада-чурттуң камгалакчылары” деп Күрүне фондузун тургузарының дугайында чарлыкка ат салганын сагындыраалы. Фондуну федералдыг бюджеттен акшаландырар болгаш ол хөй хүлээлгелиг төп ышкаш ажылдаар. Өскээр чугаалаарга, тускай шериг операциязының хоочуннары, ооң үезинде мөчээн шериглерниң өг-бүлези бо фондудан эмчи, юридиктиг болгаш өске-даа дузаны ап болурлар. Ооң салбырларын регион бүрүзүнге ажыдар.
Чаа структура 2022 чылдың февраль 24-тен тура Донецк болгаш Луганск Улус Республикаларның, 2022 чылдың сентябрь 30-ден тура Херсон база Запорожье областарының девискээрлеринге тускай шериг операциязынга киржип турган дайынчы хөделиишкиннерниң хоочуннарынга; ДУР-нуң Чепсектиг Күштериниң болгаш ЛУР-нуң улусчу милициязының хүрээлеңинге Донбасска дайынчы хөделиишкиннерниң киржикчилеринге; тускай шериг операциязынга мөчээн дайынчыларның, а ол ышкаш фронтуга алганы балыгланыышкындан база аарыглардан мөчээн шериглерниң өг-бүлелериниң кежигүннеринге дузаны кадар.
Тывада харыысалгалыг яамыларның болгаш албан черлериниң специалистери регионалдыг салбырны тургузары-биле амгы үеде улуг хемчээлдиг идепкейлиг ажылды чорудуп турар. Мөөңнелгеге алдынган хамаатыларның болгаш эки турачыларның дугайында медээ-дыңнадыгларны чугулалаан, өг-бүле бүрүзүнге тодаргай быжыглаан социал координаторларның даңзызын тургускан, фондунуң ажылдаары оран-саваны шилип турар. Курлавыр хандырылгазының шинчилелин база анализин чорудар республика төвүнүң директору, Тывадан тускай шериг операциязының киржикчилеринге дуза көргүзер чаңгыс аай штабтың харыысалгалыг секретары Байлак Ондарның чугаазы-биле алырга, чоокку үеде Москвага социал координаторлар өөредилгени эртерлер, ол үеге чедир регионалдыг Фондунуң аппарады хевирлеттинер.
Тускай шериг операциязының киржикчилерин болгаш оларның өг-бүлелериниң кежигүннерин деткиириниң талазы-биле комплекстиг ажылды Тывадан хамаатылар тускай шериг операциязынга киржип эгелей берген үеден тура организастаан. 2023 чылдың январь айдан тура тускай шериг операциязы-биле холбашкан бүгү айтырыгларны Тываның ТШО талазы-биле тускай төлээзи Тимур Куулар харыылап эгелээн, бөгүн база ол чаңгыс аай штабтың ажылын удуртуп турар.
Губернатор Владислав Ховалыгның айтыышкыны-биле дайынчы хөделиишкиннерниң киржикчилеринге болгаш оларның өг-бүлелеринге деткимчениң хевирлери аңгы-аңгы, ооң иштинде – бүгү эмнелге черлеринге эмнеп-домнаашкын. Кээп турар шериг албанныглар-биле ажылдарга немелде дериг-херекселдерни дерип турар. Оон аңгыда, Тываның Кадык камгалал яамызының дыңнадып турары-биле, дайынчыларны диш эмчилеринге, ооң иштин- де – хууда клиникаларда, халас эмнедириниң арга-шинээн көрүп турар.
Ол ышкаш регионнуң эрге-чагыргалары дайынчы хөделиишкиннерниң хоочуннарын болгаш оларның өг-бүлезиниң кежигүннерин ажыл-биле хандырарының айтырыгларын ажылдап кылып турар. Чонну ажылга хаара тударының төвү оларның профбелеткелиниң, эде белеткелиниң, а ол ышкаш бажың-балгадынга боттуң ажыл-херээн ажыдып алыры-биле социал керээни чарарының талазы-биле ажылдарны чорудуп турар.
Россияның Тыва Республика талазы-биле Социал фондузунда “изиг шугумнуң” 8-800-200-0543 дугаарлыг телефону ажылдап турар, ону дамчыштыр төлевирлерниң, пособиелерниң болгаш дайынчы хөделиишкиннерниң хоочуннарынга база мөчээн шериг албанныгларның өг-бүлелеринге көрдүнген эдип-чазалганың техниктиг дериг-херекселдериниң дугайында билип ап болур.
"Шын" №26 2023 чылдың апрель 12
#Шынсолун #Тыва #ТШО #РоссияныңПрезидентизи #ТываРеспублика #СоциалФонд
Тывага тускай шериг операциязының киржикчилерин деткиириниң талазы-биле Күрүне фондузунуң регионалдыг салбыры тургустунар
12 апреля 2023
82