Январь 26-да Улусчу чогаадылга бажыңынга республиканың эң-не тергиин чогаадыкчы коллективтеринге ТР-ниң Культура яамызының шаңналын тывыскан.
“Тываны алдаржыткан салым-чаяанныглар” деп түңнел концертке боттарының уран чогаадыкчы чедиишкиннери-биле шылгарап үнген, үлегерлиг коллективтер база катап чонга уран талантызын бараалгаткан.
Аңаа Тываның культура сайыды Виктор Чигжит чыылганнарга байыр чедирип сөс алгаш, 2023 чылдың түңнелдерин үндүрүп тура, республиканың чогаадыкчы коллективтери делегей чергелиг, бүгү-российжи, регионнар аразының фестивальдарынга, мөөрейлеринге Тываны төлээлеп киришкеш, 30 ажыг шаңналды чаалап алганы улуг чедиишкин дээрзин демдеглээн:
Бо хүнде республикада Улустуң болгаш Үлегерлиг 34 коллектив бар РФ-тиң улусчу чогаадылгазының алдарлыг коллективи аттыг 4 коллектив бар. Бистиң республикада улусчу уран чогаадылга шак мынчаар сайзырап турары өөрүнчүг – деп, культура сайыды демдеглээн.
Ол хүн болган хемчегге Россияның Культура яамызының мурнундан “ РФ-тиң улусчу чогаадылгазының алдарлыг коллективи” бедик атты Эрзин кожууннуң “Эзир-Уя” улусчу аас чогаал ансамблинге тывыскан.
ТР-ниң Культура яамызының “Үлегерлиг чогаадыкчы коллектив” деп шаңналынга Кызылдың А. Шатин аттыг хореография школазының уругларның “Алаң-тос” классиктиг баледи, Ак-Довурактың “Бадма” мода болгаш костюм театры болгаш уругларның уран чүүл школазының “Сайдаяк” уругларның хореография ансамбли төлептиг болган.
ТР-ниң Культура яамызының шаңналы болгаш өөрүп четтириишкин бижиин Чөөн-Хемчиктиң Теве-Хаяда “Тос-Долаан” театр коллективиниң киржикчизи, ийи дакпыр республика чергелиг шүлүк мөөрейлериниң тиилекчизи Айдаш Сааяга тывыскан.
ТР-ниң Культура яамызының шаңналынга: “Онзагай” хореография ансамбли (Ак-Довурак хоорай), “Хербис” танцы коллективи (Кызыл кожуун), “Аржаан” хореография ансамбли (Бии-Хемниң Аржаан суур), “Бадма” мода болгаш костюм театры (Ак-Довурак хоорай), “Дембилдей” аас чогаалының ансамбли (Улуг-Хем кожуун), Орус улустуң национал хөгжүм херекселиниң ансамбли (Мөңгүн-Тайганың Мугур-Аксында уругларның уран чүүл школазы), “Раздолье” орус улустуң ыры ансамбли (Кызылдың Орус культура төвү), «Эдельвейс» үлегерлиг чогаадыкчы коллектив (Чеди-Хөлдүң Хову-Аксында уругларның уран чүүл школазы), «Чинчилиг» мода театры (Эрзин кожуун), «Баян-Дугай» мода болгаш костюм театры (Чөөн-Хемчик кожуун), «Он-Кум» мода болгаш костюм театры (Улуг-Хем кожуун), «Аян тудаал» ВИА (Кызыл кожуун), Чалыы көрүкчүнүң театры (Кызыл хоорай), “Эзир-Уя” аас чогаал ансамбли (Эрзин кожуун) төлептиг болган.
Бистиң корр.
Медээ болгаш чуруктарны ТР-ниң Культура яамызының сайтызындан алган.
“Шын” № 7 2024 чылдың январь 31