Вячеслав Донгакты «Буян-Бадыргы» орденниң III чергези-биле шаңнаан.
Тывага ат-сураглыг культура ажылдакчызы, балетмейстер, дизайнер, башкы Вячеслав Донгактың ийи дакпыр юбилейи: 70 харлаанынга база чогаадыкчы ажылының 50 чыл оюнга тураскааткан «Өгбелерниң өнчүзү» деп профессионал уран чүүлдүң делегей чергелиг фестивалы болуп эрткен. Фестиваль Хамаарышпас күрүнелерниң демнежилгезиниң чурттарындан, Моол, Мурнуу Көрея база Россияның аңгы-аңгы регионнарындан талантылыг хореографтарны, дизайнерлерни база ооң уран чогаадылгазының мөгейикчилерин чыгган.
В. Көк-оол аттыг Национал хөгжүм-шии театрынга фестивальдың байырлыг ажыдыышкынын «Эдегей» танцы болгаш костюм театры өңгүр чараш көргүзүү-биле эгелээн. Коллектив «Национал костюм – чоннуң эртинези» деп программазында тыва идик-хептиң кайгамчыктыын болгаш хөй талалыын көргүскен.
Тыва Республиканың Чазааның Даргазының оралакчызы Орлан Сарыглар Тываның Баштыңы Владислав Ховалыгның адындан аалчыларга болгаш киржикчилерге байырны чедирип, юбилярның танцы-сам уран чүүлүн хөгжүдеринге база Тываның онзагай арыны апарган «Эдегей» танцы болгаш костюм театрын тургузарынга үнелеп ханмас улуг үлүг-хуузун демдеглээн. Байыр чедириишкининде республиканың культуразынга Вячеслав Донгактың чогаадыкчы ажылының ужур-дузазын онзалап демдеглээн.
- Тываның национал хөгжүм болгаш танцы театры – бистиң алдаржаан «Саяннар» ансамбливиске чогаадыкчы ажылыңарның дыка хөй чылдарын берген силер. Республиканың онза төөгүлүг болгаш хөй-ниити байырлалдарынга тураскааткан улуг культурлуг төлевилелдерниң режиссер-тургузукчуларының баштайгыларының бирээзи силер – деп, вице-премьер бодунуң чугаазында айыткан.
Даштыкыга Тываның культуразын таныштырып нептередиринге Вячеслав Донгактың үнелеп четпес үлүг-хуузун Орлан Сарыглар демдеглээн. Мастерниң хөй чылдарда үре-түңнелдиг ажылы күрүне шаңналдары болгаш хүндүлүг аттар-биле демдеглеттинген. Юбилейлиг кежээде Вячеслав Донгакка Тыва Республиканың «Буян-Бадыргы» ордениниң III чергезин тывыскан.
Фестиваль үезинде мөөрейлиг көрүлделер база эрткен. «Үүрмек чүүлдерниң кайгамчыктыы» дизайнерлер мөөрейинге амгы үениң идик-хевинче чоннуң культуразын дамчыдарынга чаа көрүштү бараалгаткан. Киржикчилер ханы уткалыг хээлер, хевирлер болгаш өңнерни ажыглаан коллекцияларда чаартыкчы чогаадыкчы базымнарны көргүскен. Улусчу танцы-сам мөөрейинге салдынган танцылар «Азияның чүрээ» хореграфтар мөөрейиниң эң чараш кезээ болган.
Фестиваль август 24-те тиилекчилерниң гала-концерти база шаңнал-макталдар-биле доозулган.
Тываның Чазааның парлалга албаны.
Чурукту интернет четкизинден хоолгалаан.
2025 чылдың август 28 “Шын” №33